Davlat test markazining xorijiy va xalqaro tashkilotlar bilan hamkorligi to’g’risida ma’lumot
Xorijiy va xalqaro nodavlat tashkilotlar:
DAVLAT TEST MARKAZI - «OXFORD UNIVERSITY PRESS»: HAMKORLIK YO‘LIDA
2017-yil 28-noyabr kuni Davlat test markazi rahbariyati va ekspertlari «Oxford University Press»ning mintaqaviy menejeri Martin Kurtis, «Oxford University Press»ning Qirg‘izistondagi vakili Aida Ishenbaeva va “ZAR DONISH” xususiy korxonasi rahbari Shaira Avazova bilan uchrashuv bo‘lib o‘tdi.
Davlat test markazi direktori M.M.Karimov mehmonlarni markazning asosiy vazifalari, oliy ta'lim muassasalariga kirish imtihonlarini tashkil qilish, test materiallari, shu jumladan CEFR tavsiyalari asosida tayyorlanishi bilan tanishtirdi.
Martin Kurtis uchrashuv qatnashchilarini «Oxford University Press» faoliyati, yangi onlayn test tizimida “so‘zlash” mahoratini tekshirish imkoniyatlari borligi to‘g‘risida ma'lumot berdi.
Aida Ishenbaeva «Oxford University Press»ning Qirg‘iziston Respublikasidagi faoliyati, oliy ta'lim muassasalariga kirish imtihonlari tizimi to‘g‘risida to‘htalib o‘tdi.
Taraflar tajriba almashish, kelajakdagi hamkorlik to‘g‘risida o‘z fikr va mulohazalarini bildirdilar. Bu esa o‘z o‘rnida test materiallari va test tizimi sifati yaxshilanishi uchun yangi qadam bo‘lib xizmat qilishi kutilmoqda.
O‘zbekiston Respublikasi Vazirlar mahkamasi huzuridagi Davlat test markazining UNESCO tashkiloti bilan “Ilm-fan va ta'lim sohasida” xalqaro hamkorlik dasturi asosida amalga oshirilgan ishlar to‘g‘risida:
Ilm-fan va oliy ta'lim sohasida global islohotlarni amalga oshirish maqsadida UNESCO tashkiloti va Davlat test markazi hamkorlikda turli yo‘nalishdagi tadbirlar o‘tkazilgan. O‘tkazilgan tadbirlarda Davlat test markazining quyidagi xodimlari ishtirok etishgan:
Davlat test markazi sobiq direktori B. Ismoilov 2013-yil 21-23-may kunlarida Bangkok shahrida o‘tkazilgan “Osiyo va Tinch okeani mintaqasida oliy ta'lim sohasida malakalarni tan olish to‘g‘risida” mavzusida tashkil etilgan konferensiyada ishtirok etgan.
2016-yil 5-7-dekabr kunlari Qozog‘istonning Almati shahrida UNESCO tomonidan “Savodxonlikni baholash, testlarni ishlab chiqish” mavzusida mintaqaviy seminar tashkil etildi. Ushbu seminarda UNESCO ishlari bo‘yicha O‘zbekiston Respublikasi Milliy kengashi taklifiga binoan O‘zbekiston Respublikasi Vazirlar Mahkamasi huzuridagi Davlat test markazining Test sinovlari texnologiyalarini rivojlantirish bo‘limi boshlig‘i U.Dusnazarov ishtirok etdi.
Seminarning asosiy maqsadi ta'lim sifatini oshirish borasida o‘quvchilar o‘zlashtirish darajasini baholash uslublarini ishlab chiqish bo‘lib, unda UNESCOning Bangkokdagi mintaqaviy vakolatxonasi va Pirson attestatsiya markazi mutaxassislari tomonidan testlar ishlab chiqish uslublari bo‘yicha amaliy mashg‘ulotlar tashkil etildi.
Seminar mashg‘ulotlarini Sidney Universiteti qoshidagi Ta'lim darajalarini o‘lchash va baholash markazi direktori, professor Djim Tognolini quyidagi quyidagi mavzular bo‘yicha olib bordi.
Shuningdek, seminar davomida 2013-yil mart oyidan UNESCOning Bangkokdagi mintaqaviy vakolatxonasida ish boshlagan Osiyo–Okeaniya mintaqalarida ta'lim sifati monitoringini olib boruvchi NEQMAP tashkiloti haqida ma'lumotlar berildi.
UNESCO mintaqaviy seminaridan o‘rganilgan tajriba va ma'lumotlar asosida taqdimot tayyorlanib, Davlat test markazida 2016-yil 14-dekabr kuni tashkil etilgan Respublika ta'lim muassasalariga 2017/2018-o‘quv yili qabul test sinovlarida foydalanishga tavsiya etiladigan test topshiriqlari bazasini o‘rganish va uni zamon talablari asosida shakllantirishda Davlat komissiyasi tomonidan tasdiqlangan umumta'lim fanlari bo‘yicha ekspertlar guruhlarining faoliyatini samarali tashkil etish va testologiya sohasidagi ko‘nikmalarini yanada rivojlantirish maqsadida fan ekspertlari uchun test topshiriqlarini tuzish va uni ekspertizadan o‘tkazish bo‘yicha o‘quv seminar mashg‘ulotlarida ishtirok etildi.
Davlat test markazi bo‘lim boshliqlari B. Nazarov, A. Baratov 2016-yil 1-dekabrda Toshkent shahrida tashkil etilgan “Hayot davomidagi ta'lim” mavzusidagi UNESCO tashkiloti hamda Germaniyaning DVV international tashkiloti bilan hamkorlikda tashkil etilgan konferensiyada ishtirok etishgan.
Davlat test markazi xodimi Z. Olimbekov 2016-yil 15-16-dekabr kunlari Toshkent shahrida tashkil etilgan “Hayot davomidagi ta'lim” hamda 2015-2030-yillarga tasdiqlangan BMTning Barqaror rivojlanish dasturining (Barchaga inklyuziv va sifatli ta'lim berish va hayot davomida ta'lim olish imkoniyatini yaratish) 4-maqsadini amalga oshirish mavzusidagi UNESCO tashkiloti hamda Germaniyaning DVV international tashkiloti bilan hamkorlikda tashkil etilgan konferensiyada ishtirok etgan.
Bundan tashqari UNESCO tashkiloti bilan hamkorlikda “Osiyo va Tinch okeani mintaqasi davlatlarida o‘quv kurslari, oliy ma'lumot to‘g‘risidagi diplomlar va ilmiy darajalarni tan olish to‘g‘risida” gi UNESCO konvensiyasiga qo‘shilish masalasi bo‘yicha ishlar olib borilmoqda.
DTMga tashrif buyurgan xalqaro ekspertlari haqida ma'lumot
Buyuk Britaniya
1. 2018-yil Davlat test markazi rahbariyatining Lankaster universiteti eksperti doktor Rita Grin bilan uchrashuvi bo‘lib o‘tdi. Chet tillari va boshqa umumiy fanlar
2. 2018-yil 25-sentyabrda Davlat test markazida chet tillarini bilish darajasini baholash boshqarmasi rahbariyati va mutaxassislari hamda “Cambridge Assessment International Education” Xalqaro aloqalar bo‘yicha bo‘limi boshlig'i D. Bruker bilan uchrashuv bo‘lib o‘tdi.
DTM direktori mehmonni DTM umumiy faoliyati va 2018-2019 o‘quv yilida respublikaning oliy o‘quv yurtlarida o‘tkazilgan test sinovlari natijalari bilan tanishtirdi. Bu yilgi test sinovi jarayonidagi yangiliklarga alohida e'tibor qaratildi.
Boshqarma boshlig’I S.Rajabov Chet tillarini bilish darajasini baholashning milliy test tizimi va boshqarma to‘g'risida so‘zlab berdi.
Chet tillarni bilish darajasining pedagogik o‘lchovlarini rivojlantirish bo‘limi boshlig’i E.Uraeva bo‘lim tomonidan tuzilgan testlarning xususiyatlari va tuzilishi to‘g'risida nutq so‘zladi.
D. Bruker boshqarma va DTM tomonidan olib borilayotgan ishlarga qiziqish bildirdi. Shuningdek, u chet tillar bo‘yicha bilim darajani aniqlashda imkon beradigan “Cambridge Assessment International Education”, «on-linemulti-level» testlari faoliyati haqida ham so‘zlab berdi.
DTM mutaxassislarining malakasini oshirish bo‘yicha hamkorlik yo‘llari Davlat test markazi bazasi hamda Kembrij universitetida bazasi asosida aniqlandi.
3. 2018-yil 27-sentyabr kuni Xalqaro biznes markazida Britaniyaning O‘zbekistondagi Kengashi tomonidan tashkil etilgan "Ta'lim sohasida O‘zbekiston-Britaniya hamkorligining yangi istiqbollari" o‘quv forumi bo‘lib o‘tdi. Ushbu tadbirga Buyuk Britaniyaning turli universitetlaridan o‘qituvchilar delegatsiyasi taklif qilindi.
Forumda Buyuk Britaniyaning O‘zbekistondagi elchisi Kristofer Allan, O‘zbekistonning turli universitetlari mutaxassislari, vazirlik va idoralar vakillari ishtirok etishdi.
Nutqlarda asosiy e'tibor ta'lim sohasiga oid provayderlarni topish masalalariga qaratildi. Bir qator ma'ruzalar tinglandi, unda O‘zbekiston va Buyuk Britaniya o‘rtasidagi hamkorlik imkoniyatlari haqida so‘z yuritildi.
Forumda ishtirok etgan DTM vakillari S.Rajabov va E.Uraeva, Kembrij universiteti vakillari, "Cambridge Assessment International Education" Shimoliy va Markaziy Osiyo dasturlari rahbari Stiven King bilan birgalikda kelgusidagi hamkorliklar haqida muhokama qildilar.
2019-yil 4-fevral kuni Davlat test markazi direktori Majid Karimov Britaniya baholash kengashi mutaxassislari Viktoriya Klark, Antoaneta Yordanova, Britaniya Kengashining O‘zbekistondagi vakolatxonasi rahbarining o‘rinbosari Jamilya G'ulomova, imtihonlar bo‘limi ish yurutuvchisi Gulnoza Najmiddinova hamda aloqalar bo‘yicha ish yurutuvchi Emine Shayxetovalar bilan uchrashish yo‘lga qo‘yildi.
Britaniya Kengashining O‘zbekistondagi vakolatxonasi rahbarining o‘rinbosari Jamila G'ulomova ushbu uchrashuvni tashkil qilgani uchun DTM rahbariyatiga minnatdorlik bildirdi va O‘zbekistonda ingliz tilini o‘rganish bo‘yicha olib borilayotgan islohotlar haqida gapirdi. Oliy va xalq ta'limi vazirliklari, Davlat test markazi va Britaniya kengashi birgalikda ishlasa, ushbu islohotlarni yanada takomillashtirish muvaffaqiyatli bo‘lishini ta'kidladi.
O‘z navbatida DTM direktori Majid Karimov Britaniya Kengashining O‘zbekistondagi vakolatxonasi bilan ijodiy hamkorlik davom etayotganidan mamnunligini bildirdi va hamkorlikning kelgusida yangi yo‘nalishlariga umid bildirdi. Ushbu yig'ilishda chet tili o‘qituvchilarining oylik ish maoshlariga ustama haqi belgilashni aniqlash, O‘zbekistonda ushbu imtihonning o‘ziga xos xususiyatlari to‘g’risida aytib o‘tildi hamda “Aptis” test sinovi ingliz tili o‘qituvchilarining oylik maoshiga ustama belgilash maqsadida foydalanish imkoniyatlariga alohida e'tibor qaratildi.
Baholash bo‘yicha mutaxass Viktoriya Klark ingliz tili o‘qituvchilari uchun Aptis imtihonining tarkibi va mazmuni, tinglab tushunish, o‘qish, yozish, gapirish, leksikai va grammatika ko‘nikmalari bo‘yicha baholash mezonlari bo‘yicha batafsil ifodalab berdi hamda DTM mutaxassislarining savollariga javob berdi.
O‘zbekiston Respublikasida chet tili o‘qituvchilarining oylik maoshiga ustama haqi berishni belgilash maqsadida Britanya Kengashi va DTM ishchi guruhlari birgalikda ushbu imtihondan foydalanishning bir qator tashkiliy jarayonlari to‘g’risida muhokamalar olib borildi.
Ta'kidlash joizki, DTM va Britaniya Kengashi o‘rtasidagi ijodiy aloqalar 5 va 6 fevral kunlari O‘zbekiston davlat jahon tillari universitetida bo‘lib o‘tgan Britaniya Kengashining "Ingliz tili milliy islohotlarining asosiy muvaffaqiyat omillari va muammolari" konferentsiyasida davom ettirildi.
Shuningdek, o‘qituvchilari uchun Aptis testi 2020-yil noyabr oyidan boshlab ingliz tili fani o‘qituvchilari oylik maoshiga ustama haqi olish maqsadida Chet tilini bilish va egallash darajasini baholash boshqarmasi tomonidan o‘tkazilib kelinmoqda.
2019yil oktyabr oyi. Davlat test markazi rahbariyati NILE direktori Tom Kiddl bilan uchrashdi
NILE - bu o‘qituvchilarni rivojlantirish bo‘yicha ixtisoslashgan institut bo‘lib, u butun dunyo o‘qituvchilari uchun eng yuqori sifatli kurslarni tashkil qiladi. Har yili NILE da mingdan ortiq tilni o‘qitish bo‘yicha mutaxassislar NILE institutiga tashrif buyurishadi.
NILE Evropaning aynan ingliz tili o‘qituvchilari, trenerlari va boshqa ta'lim mutaxassislari uchun ta'lim kurslarini samarali tashkil etuvchi eng yirik institutga aylandi.
NILE akkreditatsiyalangan EnglishUK, British Council va Eaquals va Kembrij imtihonlari uchun rasmiy imtihon markazining a'zolari hisoblanadi.
NILE bu Cambridge English ingliz tili imtihonlariga tayyorgarlik kurslarini maxsus tartibda o‘tkazadi, shuningdek, Buyuk Britaniyaning magistratura darajasida kurslar tashkil etish bo‘yicha akkreditatsiyadan o‘tgan xususiy tashkilotlardan biridir.
NILE direktori Tom Kidl CEFRni hisobga olgan va ingliz tilini o‘qitishning yangi tendentsiyalarini hisobga olgan holda mutaxassislarni malakasini oshirish dasturlarida katta tajribaga ega bo‘lgan ta'lim muassasasi haqida ma'lumot berdi.
Institut Kembrij universiteti bilan o‘zaro aloqada. Malaka oshirish dasturlari ushbu nufuzli universitet mutaxassislari bilan hamkorlik qilishni nazarda tutadi.
Tom Kidl shuningdek, universitetda mavjud dasturlarini DTM tomonidan ma'lum bir tinglovchilar tarkibi manfaatlariga moslashtirish imkoniyati mavjudligini ta'kidladi.
Uchrashuv yakunlari bo‘yicha quyidagilarga erishildi:
1. DTM va NILE o‘rtasidagi hamkorlikni davom ettirish.
2. DTM xodimlarining malakasini oshirish bo‘yicha shartnoma loyihasi tafsilotlarini tasdiqlash.
Eslatib o‘tamiz, 2019-yil noyabr oyida erishilgan kelishuvlar natijalari bo‘yicha NILE institutida Chet tillarini bilish va egallash darajasini baholash boshqarmasi xodimlari malakasini oshirish maqsadida tashrif buyurishdi.
Germaniya
2018-yil Oktyabr. Varda Karolina - Gyote instituti bosh ofisi vakili (Myunxen, Germaniya). B2 darajasidagi test topshiriqlarini va gapirish imtihon va yozma ishlarni baholash mezonlarini ishlab chiqish bo‘yicha mutaxassis.
2019-yil 4-fevral. Chet tillarni bilish va egallash darajasini baholash boshqarmasiga Barbara Dumbolt tashrif buyurdi. Barbara Dumbolt maslahatchi, DSD koordinatori, chet davlatlardagi nemis tili maktablarining rahbari. U Deutshes sprachdiplom (DSD) xalqaro nemis tili fani bo‘yicha imtihonini tashkil etish va o‘tkazish bo‘yicha katta tajribaga ega.
Barbara Dumbolt boshqarma boshlig’i Sardor Radjabovning chet tillarini bilish va egallash darajasini baholash boshqarmasi tomonidan o‘tkazilgan imtihonlar haqidagi ma'lumotlarini katta qiziqish bilan tingladi.
Shuningdek, ishtirokchilar Germaniyaning Deutshes sprachdiplom (DSD) xalqaro imtihonining o‘ziga xos xususiyatlari to‘g'risida ko‘plab savollar berishdi. Test topshiriqlarini tayyorlash bo‘yicha maslahatlashdi.
Tomonlar hamkorlikni davom ettirish va kelgusida tegishli memorandumni imzolash to‘g'risida o‘zlarining fikrlarini bir ovozdan bildirishdi.
