“OXFORD UNIVERSITY PRESS” TASHKILOTI BILAN MEMORANDUM IMZOLANDI
2024-yil yil fevral oyida Bilimni baholash agentligi delegatsiyasi Angliya, Fransiya davlatlariga amaliy tashrifi davomida “Oxford University Press” tashkilotida ham bo‘lib, o‘zaro hamkorlik qilishga kelishilgan edi. Ushbu hamkorlikni davom ettirish maqsadida 13-14-may kunlari “Oxford University Press” tashkiloti delegatsiyasi Bilimni baholash agentligiga tashrif buyurdi.
Tashrifning dastlabki kunida delegatsiya vakillari Agentlikning Namangan viloyatida qurib foydalanishga topshirilgan test sinovlari o‘tkaziladigan binosida bo‘lib, u yerda talabgorlar uchun yaratilgan shart-sharoitlar bilan tanishishdi.
Tashrifning ikkinchi kunida ikki tomonlama hamkorlik yo‘nalishlari, xususan, “Oxford test of English” testini Agentlik bilan hamkorlikda respublikaning barcha hududlarida tashkil etish masalasi muhokama qilindi.
Uchrashuv yakunida Bilimni baholash agentligi hamda “Oxford University Press” tashkiloti o‘rtasida baholash sohasida hamkorlik aloqalarini yanada mustahkamlash yuzasidan Memorandum imzolandi.
CAMBRIDGE ASSESSMENT TASHKILOTI BILAN HAMKORLIK KENGAYTIRILMOQDA
2024-yil 6-fevral kuni Bilimni baholash agentligi delegatsiyasi ishchi tashrif bilan Buyuk Britaniyada joylashgan Cambridge Assessment tashkilotiga tashrif buyurdi.
Uchrashuvning dastlabki kunida har ikki tomon taqdimot qilib, o‘z faoliyati to‘g‘risida ma’lumot berdi.
So‘ngra baholash sohasiga sun’iy intellektni joriy etish, test sinovlarini onlayn shaklda o‘tkazish, test topshiriqlarini shakllantirish, ekspertlarning tayyorgarlik darajasiga qo‘yiladigan talablar bo‘yicha o‘zaro fikr almashildi hamda Cambridge Assessment tashkiloti tomonidan o‘tkaziladigan ingliz tilini bilish darajasini baholash imtihonlarini Bilimni baholash agentligi bilan hamkorlikda O‘zbekistonda tashkil etish va o‘tkazish yuzasidan takliflar muhokama qilindi.
Kun yakunida Bilimni baholash agentligi va Cambridge Assessment tashkiloti o‘rtasidagi hamkorlik aloqalarini yanada rivojlantirish maqsadida Anglashuv Memorandumi imzolandi.
YAPONIYANING “KEI ADVANCED INC.” TASHKILOTI BILAN MEMORANDUM IMZOLANDI
2023-yil 11-may kuni Bilim va malakalarni baholash agentligi va Yaponiyaning “Kei Advanced Inc.” tashkiloti o‘rtasida hamkorlik aloqalarini yo‘lga qo‘yish maqsadida onlayn uchrashuv bo‘lib o‘tdi.
Unda Bilim va malakalarni baholash agentligi direktori Madjit Karimov, boshqarma boshlig‘i Javlonbek Nurmatov va bosh mutaxassis Nasimbek Lutfiyev hamda “Kei Advanced Inc.” tashkiloti rahbari Toshio Yajima va “Kawaijuki Gorup Company” tashkiloti vakillari ishtirok etdi.
Uchrashuvda baholash sohasida tajriba almashish, umumta’lim maktablari o‘quvchilari uchun matematika fanidan diagnostik testlarni tashkil etish, agentlik tomonidan o‘tkaziladigan ingliz tilini bilish darajasini aniqlashning ko‘p darajali tizimini Yaponiya universitetlari tomonidan tan olinishiga erishish kabi masalalar muhokama qilindi va ikki tashkilot o‘rtasida Memorandum imzolandi.
Tashkilot rahbarlari Memorandum imzolash orqali muhim yo‘nalishlarda hamkorlik qilishga va o‘zaro hamkorlik aloqalarini yanada mustahkamlashga kelishib oldilar.
TURKIYA RESPUBLIKASINING BAHOLASH, TANLASH VA JOYLASHTIRISH MARKAZI BILAN MEMORANDUM IMZOLANDI
Turkiya Respublikasining Baholash, tanlash va joylashtirish markazi bilan hamkorlikni yanada mustahkamlash hamda ikki tashkilot o‘rtasida Memorandum imzolash maqsadida 2022-yil 14-mart kuni Davlat test markazi delegatsiyasi Turkiya Respublikasida bo‘lib qaytdi.
15-mart kuni Turkiya Respublikasining Baholash, tanlash va joylashtirish markazi hamda O‘zbekiston Respublikasi Vazirlar Mahkamasi huzuridagi Davlat test markazi o‘rtasida test sinovlarini o‘tkazish, baholash, tanlash, joylashtirish va mazkur yo‘nalishda axborot xavfsizligini ta’minlash yuzasidan tajriba almashish hamda bu sohada o‘zaro manfaatli hamkorlikni rivojlantirish maqsadida Memorandum imzolandi.
Davlat test markazi va Turkiya Respublikasining Baholash, tanlash va joylashtirish markazi Memorandum imzolash orqali muhim sohalarda hamkorlik qilishga kelishib oldilar.
QOZON FEDERAL UNIVERSITETI BILAN MEMORANDUM IMZOLANDI
2022-yil 9-mart kuni Davlat test markazi va Qozon federal universiteti o‘rtasidagi navbatdagi onlayn uchrashuv bo‘lib o‘tdi.
Unda Davlat test markazi direktori Madjit Karimov, direktor o‘rinbosarlari Sardor Radjabov va Sherzod Batirov, Chet tilini bilish va egallash darajasini baholash boshqarmasi boshlig‘i Javlonbek Nurmatov, Xalqaro reytinglar bo‘yicha faoliyatni amalga oshirish bo‘limi bosh mutaxassisi Nasimbek Lutfiyev, Qozon federal universiteti rektori vazifasini vaqtincha bajaruvchi Dmitriy Tayurskiy, prorektor Timirxan Alishev, Tashqi aloqalar departamenti direktori Olga Vershinina, universitet huzuridagi Filologiya va madaniyatlararo aloqalar instituti direktori Radif Zamaletdinov hamda universitetning bir qator vakillari ishtirok etdi.
Uchrashuvda har ikki tomon rahbarlari muntazam tajriba almashish, aloqalarni mustahkamlash, uchrashuvlarning davomiyligini ta’minlash choralarini muhokama qildilar va ikki tashkilot o‘rtasida Memorandum imzolandi.
Davlat test markazi va Qozon federal universiteti Memorandum imzolash orqali muhim sohalarda hamkorlik qilishga kelishib oldilar. Faoliyat yo‘nalishlaridan kelib chiqqan holda Memorandumda rus tilidan test topshiriqlarini shakllantirish, buning uchun ishchi guruh tashkil qilish, hamkorlikda test topshiriqlari spetsifikatsiyasi va boshqa muhim jihatlar ustida amaliy ishlar olib borish ko‘zda tutilgan.
OZARBAYJON DAVLAT IMTIHON MARKAZI BILAN MEMORANDUM IMZOLANDI
Oxirgi yillarda Davlat test markazi xorijiy mamlakatlarning sohaga yaqin tashkilotlari bilan hamkorlikni rivojlantirib bormoqda. Bu borada Sharqiy Osiyo, Yevropa, Mustaqil davlatlar hamdo‘stligi mamlakatlari bilan hamkorlik yetakchi bo‘lmoqda.
Ayniqsa Ozarbayjon Respublikasining Davlat imtihon markazi bilan olib borilayotgan ishlar ko‘lami kengayib borayotganligini qayd etish kerak. O‘tgan yillarda Davlat test markazi delegatsiyasi ushbu mamlakatda bo‘lib, ular bilan tajriba almashgan edi. Hozirgi kunda davom etayotgan pandemiya sharoitida bunday uchrashuvlar onlayn shaklga o‘tdi.
2021-yil 23-noyabr kuni Davlat test markazi va Ozarbayjon Davlat imtihon markazi o‘rtasidagi navbatdagi onlayn uchrashuvda har ikki tomon rahbarlari xalqlarimizning tarixiy yo‘llari, qalban yaxlitligi, azaldan madaniy-ma’rifiy, adabiy hayoti uyg‘un ekanligini e’tirof etdilar. Shu bilan birga, tadbir davomida har ikki markaz muntazam o‘z tajribalarini almashish, aloqalarni mustahkamlash, uchrashuvlarning davomiyligini ta’minlash choralarini muhokama qildilar va ikki tashkilot o‘rtasida Memorandum imzolandi.
Davlat test markazi va Ozarbayjon Davlat imtihon markazi Memorandum imzolash orqali muhim sohalarda hamkorlik qilishga kelishib oldilar. Faoliyat yo‘nalishlaridan kelib chiqqan holda Memorandumda quyidagi hamkorlik maqsadlari ko‘zda tutildi:
test tizimini rivojlantirish;
baholovchilarning malakasini oshirish va baholash mezonlarini rivojlantirish;
test o‘tkazish tartibi (mahalliy va xalqaro test dasturlari);
test tizimida IT infrastrukturasi hamda axborot xavfsizligi;
tadqiqot ishlari va ilmiy nashrlar;
qabul va tanlov;
o‘quv dasturi, darsliklar va baholashni takomillashtirishda milliy islohotlar.
Uchrashuvda vakolat va faoliyat turlarining monandligi e’tirof etilgan holda hamkorlikning samarali shakl va usullarini qo‘llash hamda soha bo‘yicha muntazam tadqiqot olib borish har ikki markaz faoliyatini takomillashtirishga xizmat qilishi qayd etib o‘tildi.
