Ko‘p yillik boy tarixga ega yurtimizda vatanparvarlik, adolatlilik, insonparvarlik kabi umuminsoniy fazilatlarni shioriga aylantirgan bobokalonlarimiz bilan haqli ravishda faxralanamiz! Ular xoh shoir, xoh sarkarda, xoh yurtboshi bo‘lsin, hamisha vatan sha’ni, sharafi, farovonligi, tinchligi, adolat tantanasi uchun kurashganlar.

Shunday ulug‘ va dunyo uzra shuhrat qozongan bobolarimizdan biri – Amir Temurdir. A.Temur nafaqat o‘z davrining, balki undan keyin ham, hatto hozirgi kunda ham nomini jahon ahli hurmat bilan tilga olishga sabab bo‘lguvchi hayratlanarli ishlarni amalga oshirgan hamda bu ishlari tarixda o‘chmas iz qoldirishiga zamin yaratgan. Jumladan, harbiy san’at, adolatli siyosat bilan bir qatorda, diniy va dunyoviy ilm-fan hamda madaniyatning yuksak darajadagi taraqqiyotini ta’minlagan ulug‘ shaxslardandir.

Ma’lumki, buyuk sohibqiron Amir Temur bobomizning tavallud kuni arafasida ularni xotirlash, dillardan o‘rin olgan ezgu va pokdomon amallarini eslash qalb amriga aylandi. Shu kunlarda Temuriylar tarixi davlat muzeyi odatdagidan ko‘ra gavjum bo‘lishi ham shundan, albatta.

2022-yil 7-aprel kuni Davlat test markazi mutaxassislari, yosh xodimlari ham muzeyga tashrif buyurish orqali Temuriylar davriga sayohat qildilar. Muzey xodimlari davrga oid tarixiy eksponatlar to‘g‘risida batafsil izoh berib o‘tdilar. Tashrif xodimlar, ayniqsa, yoshlarimizda katta taassurot qoldirdi.

Davlat test markazi matbuot xizmati