Kóp jıllıq bay tariyxqa iye jurtımızda watansúyiwshilik, ádalatlılıq sıyaqlı ulıwma insanıylıq pazıyletlerdi uranǵa aylandırǵan babalarımız menen haqlı ráwishte maqtana alamız! Olar ya shayır, ya sárkarda, ya jurtbasshı bolsın, hámiyshe watan abırayı, párawanlıǵı, tınıshlıǵı, ádalat ornatıw ushın gúres alıp barǵan.

Usınday ullı hám jer júzi boyınsha dańq shıǵarǵan babalarımızdıń biri Ámir Temur.  Ol tek  ǵana óz dáwiriniń emes, bálki onnan keyinde, hátte házirgi kúnde de dúnya júzi xalqı húrmet penen tilge alıwǵa sebep bolıwshı hayran qalarlıq jumıslardı ámelge asırǵan hám bul jumısları tariyxta óshpes iz qaldırıwǵa  sebepshi bolǵan.  Ámir Temur áskeriy óner, ádalatlı siyasatı menen bir qatarda, diniy hám dúnyalıq ilim-pán hám de mádeniyattıń joqarı dárejedegi rawajlanıwın támiyinlegen ullı shaxslardan.

Bizge málim bolǵanınday,  ullı sárkarda Ámir Temur babamızdıń tuwılǵan kúni qarsańında olardı eslew, kewlimizden orın alǵan  jaqsı ámellerdi eslew júrek ámirine aylandı. Usı kúnlerde Temuriyler tariyxı mámleketlik muzeyinde hár qashanǵıdan kóbirek insanlar bolıwı da usınnan.

2022-jıl 7-aprel kúni Mámleketlik test orayı qánigeleri hám jas xızmetkerler muzeyge barıw arqalı Temuriyler dáwirine sayaxat qıldı. Muzey xızmetkerleri sol dáwirge tiyisli tariyxıy eksponantlar haqqında tolıq túsinik berip ótti. Bul sayaxat xızmetkerler, ásirese jaslarımızda úlken qızıǵıwshılıq qaldırdı.