Bitiruvchilar uchun “Ochiq eshiklar kuni” o‘tkazildi

06-12-2022 | 2283

2022-yil 6-dekabr kuni Davlat test markazida tashkil etilgan “Ochiq eshiklar kuni” tadbiriga International house akademik litseyi bitiruvchilari ishtirok etdilar.

Tadbir soat 10:00 da boshlanib, Davlat test markazi direktori M.Karimovning kirish so‘zi bilan ochildi va ishtirokchilarga dastur tanishtirildi.

So‘ngra Prezidentimizning sohaga oid qarorlari, famonlari, kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlar sonini ko‘paytirish, umumta’lim fanlaridan milliy test tizimi, shuningdek, Davlat test markazi faoliyatini tartibga soluvchi yangi normativ-huquqiy hujjatlar, qarorlar loyihalari sharhi va mazmun-mohiyati bo‘yicha keng ma’lumotlar berildi.

Mazkur tadbirning davomida Korrupsiyaga qarshi kurashish agentligi vakili Bekzod Rahmonov bitiruvchi yoshlar bilan korrupsiya tahdidi, unga qarshi kurash hamda mustahkam immunitet hosil qilish, ta’limda talabgor faqat o‘z bilimiga tayanishi, korrupsiyaga oid holatlar yuzasidan tegishli muassasalarni xabardor qilish asosiy burchlardan ekanligi to‘g‘risida hamda mamlakatimiz kelajagi shunga bog‘liq ekanligi xususida suhbatlashdi. Shu bilan birga, 9-dekabr - Xalqaro korrupsiyaga qarshi kurashish kuni doirasida “Korrupsiyaga qarshi kurashda mening o‘rnim” mavzuida o‘tkazilgan tanlov g‘oliblari taqdirlandi.

Tadbir dasturiga ko‘ra bitiruvchi yoshlarni test sinovi jarayoni bilan yaqindan tanishtirish, tartibi bo‘yicha ko‘nikma hosil qilish maqsadida ular ishtirokida majburiy fanlardan test sinovi o‘tkazildi hamda natijalar chiqarilib, test topshirgan bitiruvchilarga taqdim etildi.

Shundan so‘ng yoshlar doimiy maxsus, yopiq rejimdagi binoda faoliyat olib boruvchi boshqarma va bo‘limlar foliyati bilan tanishish, jarayonlarni o‘z ko‘zlari bilan ko‘rish uchun taklif etildilar. Bunda ular test sinovlarini tashkil etish, tayyorgarlik ko‘rish, test topshiriqlarini shakllantirish, generatsiya qilish, kitoblarni nashr etish va manzillari bo‘yicha jo‘natish, qabul qilish hamda Davlat test markaziga olib kelingan javoblar varaqalari asosida natijalarni hisoblash jarayonlari bilan yaqindan tanishtirildi.

Voqealar rivoji ishtirokchilarda katta qiziqish uyg‘otdi. Ishtirokchilarni qiziqtirgan barcha savollarga batafsil javob berildi.

 

Davlat test markazi axborot xizmati