Davlat test markazi direktori Karimov Madjit Malikovich 2021-yil 3-dekabr kuni hududlarda fuqarolar, ota-onalar, bitiruvchi sinf o‘quvchilari bilan uchrashish, muammolar va takliflarni joyida o‘rganish, sohada amalga oshirilayotgan islohotlar va yangiliklar bilan tanishtirish maqsadida Buxoro viloyatida bo‘lib, sayyor qabullar o‘tkazdi.

Sayyor qabullar O‘zbekiston Respublikasi Prezidentining Buxoro viloyatidagi  xalq qabulxonasi va Kogon shahri “Arabxona” MFYdagi Sanoat va transport kasb-hunar maktabida bo‘lib o‘tdi. Ularda mahalla vakillari, bitiruvchi yoshlar, maktab o‘qituvchilari, ota-onalar, viloyat xalq ta’limi boshqarmalari, ta’lim muassasalari rahbarlari ishtirok etdilar.

Sayyor qabullar ochiq muloqot tarzida o‘tkazilib, murojaatlarni ko‘rib chiqish va hal etish bilan bir qatorda, ishtirokchilarga kirish test sinovlariga oid eng so‘nggi yangiliklar, jarayonlarni soddalashtirish, imkoniyat va qulayliklar, mantiqiy fikrlashga yo‘naltirilgan test topshiriqlarini shakllantirish va milliy sertifikat tizimi bo‘yicha olib borilayotgan ishlar to‘g‘risida to‘xtalib o‘tildi.

Bundan tashqari, “Yashil makon” umummilliy loyihasi doirasida Davlat test markazining Buxoro viloyatida bo‘limi hududida daraxtlar ekildi.

Davlat test markazi matbuot xizmati