Joriy yilning 1-5-dekabr kunlari Davlat test markazining bir guruh xodimlari Ozarbayjon Respublikasida xizmat safarida bo‘ldi.
Tashrif Ozarbayjon Respublikasi Davlat imtihon markazi (keyingi o‘rinlarda - DIM) bilan tanishuvdan boshlandi.
DIM rahbariyati tomonidan O‘zbekistonlik mehmonlarga tashkilotning tuzilmasi, test dasturlari, kelajak dasturlari haqida, shuningdek, DIMning tashkil etilishi va faoliyati tarixi, talabalarni qabul qilish bo‘yicha davlat komissiyasi 1992-yildan faoliyat olib borayotganligi, Davlat xizmatlari bo‘yicha komissiyaga 2005-yili asos solinganligi bo‘yicha batafsil ma’lumot berildi.
Rejaga asosan delegatsiya a’zolari Texnologik nazorat va axborot xavfsizligi hamda Axborotlashtirish va texnologik ta’minot departamentining ma’lumotlar bazasini shakllantirish uchun dasturiy ta’minoti, imtihonlarni o‘tkazish va tayyorgarlik uchun dasturiy ta’minoti, javoblarni qayta ishlash, ballarni hisoblash va qabulni o‘tkazish uchun dasturiy ta’minoti kabi asosiy vazifalari, shuningdek, test materiallarining chop etilishi, nazorat qilinishi, maxsus paketlarga va yashiklarga joylanishining avtomatlashtirilgan jarayonlari bilan yaqindan tanishdilar.
Berilgan ma’lumotlarga ko‘ra Ozarbayjonda qabul testlari ikki bosqichda o‘tkaziladi. Birinchi bosqich bu 11-sinf o‘quvchilarining bitiruv imtihoni bo‘lib, bunda barcha o‘quvchilar ona tili, chet tili va matematika fanlaridan test topshirishadi. Ta’lim tili ozarbayjon tili bo‘lmagan o‘quvchilar qo‘shimcha davlat tilidan ham test topshirishadi.
DIMga shunday vazifa yuklanganki, unga ko‘ra barcha o‘quvchilar, talabalar va davlat xizmatchilarining elektron bazasi yuritiladi. Barcha vazirlik, idoralar va ta’lim muassasalarida bazaga ma’lumot kiritish bo‘yicha mas’ul belgilangan. Ular har bir davlat xizmati xodimi to‘g‘risidagi ma’lumotlar o‘zgarsa bazaga kiritishadi. Xuddi shunday o‘quvchi va talabalar haqidagi ma’lumotlar ham bazaga kiritiladi. Shuning uchun barcha imtihonlarga ro‘yxatdan o‘tish shaxsiy kabinet orqali amalga oshiriladi.
O‘ylaymizki, Ozarbayjon davlatiga qilingan tashrif va to‘plangan tajriba test tizimini takomillashtirish, iqtidorli, bilimli va yuqori salohiyatli yoshlarni saralash hamda oliy ta'lim muassasalariga qabul qilishda muhim o‘rin tutadi.
Davlat test markazi matbuot xizmati
