Bugungi kunda mamlakatimiz bo‘ylab Konstitutsiyamiz qabul qilinganligiga 30 yil to‘lishi munosabati bilan tadbirlar tashkil etilishi qizg‘in tusga kirdi.

Joriy yil 6-dekabr kuni Davlat test markazida ham O‘zbekiston Respublikasi Konstitutsiyasi qabul qilingan kun munosabati bilan davra suhbati bo‘lib o‘tdi.

Tadbirda davomida ishtirokchilarga asosiy qonunimizning qabul qilinginga 30 yil to‘lishi, ikki marta – 1992-yil sentabr va noyabr oylarida umumxalq muhokamasiga olib chiqilganligi, loyihalar muhokamasida keng jamoatchilik, butun xalqimiz faol ishtirok etib, mamlakatimizning taraqqiyot yo‘li, uning kelajagiga daxldor ko‘plab fikr-mulohazalar va takliflar bildirilgani, shuningdek, Oliy Majlis Qonunchilik palatasi tomonidan “O‘zbekiston Respublikasi Konstitutsiyasiga o‘zgartish va qo‘shimchalar kiritish to‘g‘risida”gi qonun loyihasi e’lon qilinib, loyihada asosiy qonunning 64 ta moddasiga 200 dan ortiq o‘zgartishlar kiritish hamda 16 ta normani o‘z ichiga olgan 6 ta yangi modda qo‘shish taklif etilayotgani to‘g‘risida batafsil ma’lumot berildi.

Tadbir yakunida O‘zbekiston Respublikasi Prezidentining 2022-yil 8-noyabrdagi “O‘zbekiston Konstitutsiyasining 30 yilligi” esdalik nishonini ta’sis etish to‘g‘risida” PF-243-son Farmoniga ko‘ra asosiy Qonunimizning hayotimizdagi o‘rni va ahamiyatini keng targ‘ib qilish, yosh avlodni qonunga hurmat, Vatanga mehr va sadoqat ruhida tarbiyalash ishlariga munosib hissa qo‘shib kelayotgan Davlat test markazining bir guruh xodimlari “O‘zbekiston Konstitutsiyasining 30 yilligi” esdalik nishoni bilan taqdirlandi.

Davlat test markazi axborot xizmati