Sohaga oid muammolarni joyida o‘rganish, hal qilish hamda zarur maslahat, yo‘l-yo‘riqlar ko‘rsatish maqsadida Bilim va malakalarni baholash agentligi tomonidan sayyor qabullar tashkil etilmoqda.

Navbatdagi sayyor qabul 2024-yil 28-may kuni Bilim va malakalarni baholash agentligi direktori Karimov Madjit Malikovich tomonidan Farg‘ona viloyatida o‘tkazildi.

Mazkur tadbir Farg‘ona politexnika instituti binosida aholi vakillari, talabalar, maktab bitiruvchilari va ularning ota-onalari uchun tashkil etildi.

Sayyor qabul ochiq muloqot tarzida o‘tkazildi. Unda O‘zbekiston Respublikasi Prezidentining “Oliy ta’lim tashkilotlariga o‘qishga qabul qilish va davlat buyurtmasini joylashtirish tizimini takomillashtirish to‘g‘risida” 2024-yil 24-maydagi PF-81-son farmoni, kirish test sinovlariga oid so‘nggi yangiliklar, test sinovi o‘tkazish jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, abituriyentlar uchun yaratilgan imtiyoz turlari haqida batafsil ma'lumotlar berildi.