Gyote institutining taklifiga binoan Davlat test markazi, Oliy va oʻrta maxsus taʼlimi vazirligi, Xalq taʼlimi vazirligi, Oʻrta maxsus, kasb-hunar taʼlimi markazi, Oʻzbekiston davlat jahon tillari universiteti va Toshkentdagi Gyote instituti vakillaridan iborat delegatsiya joriy yil 31 martdan 7 aprelga qadar Germaniyada boʻldi.

Delegatsiya aʼzolari Germaniyada taʼlim tizimi, xususan, maktabgacha, boshlangʻich, umumiy oʻrta va oliy taʼlim va undan keyingi taʼlim bilan yaqindan tanishdilar. Bunda asosan har bir taʼlim turining bosqichlari, muddatlari, tartib va imtiyozlari oʻrganildi.

Tashrif davomida delegatsiya aʼzolari Germaniya Federativ Respublikasining vazirlar doimiy konferensiyasi kotibiyati, Oila, taʼlim va yoshlar masalalari boʻyicha Senat boshqarmasi, Berlin shahridagi milliy nemis-rus maktabi, Potsdamdagi Gumbolt gimnaziyasi, Berlin-Brandenburg maktab, Media ishlari institutida boʻldilar. Shuningdek, taʼlim boʻyicha mutaxassis Gerrit Book, Maktablar boʻlimi xodimi Andrea Shvemmer, Taʼlim sifatini oshirish instituti xodimi Vasko Lorber, Berlindagi Oila, taʼlim va yoshlar masalalari boʻyicha Senat boshqarmasi xodimi Yeva Xeyezen, maktab direktori Karola Gnadt, maktab direktori va rus tilini oʻqitish boʻyicha mudir Jaklin Kon va boshqa mutaxassislar bilan uchrashdilar. 

Tashrif davomida yigʻilishlar, davra suhbatlari oʻtkazildi hamda taʼlim, kadrlar tayyorlash va malakasini oshirish, media taʼlim sohalari masalalari yuzasidan fikrlar almashildi, har ikkala tomonni qiziqtirgan savollarga javoblar olindi.

Axborot xizmati