Joylarda fuqarolar, ota-onalar, bitiruvchi sinf o‘quvchilari bilan uchrashish, joyida muammolar va takliflarni o‘rganish, sohada amalga oshirilayotgan islohotlar va yangiliklar bilan tanishtirish maqsadida Davlat test markazi direktori o‘rinbosari Batirov Sherzod Negmuratovich 2021-yil 1-dekabr kuni Jizzax va Sirdaryo viloyatlarida sayyor qabullar o‘tkazdi.

Sayyor qabullar O‘zbekiston Respublikasi Prezidentining viloyatlardagi Xalq qabulxonalari, mahalliy hokimliklarda, ta’lim muassasalarida bo‘lib o‘tdi va mahalla vakillari, bitiruvchi yoshlar, maktab o‘qituvchilari, ota-onalar viloyat xalq ta’limi boshqarmalari, ta’lim muassasalari rahbarlari ishtirok etdilar.

Sayyor qabullar ochiq muloqot tarzida o‘tkazilib, murojaatlarni ko‘rib chiqish va hal etish bilan bir qatorda, ishtirokchilarga kirish test sinovlariga oid eng so‘nggi yangiliklar, jarayonlarni soddalashtirish, imkoniyat va qulayliklar, mantiqiy fikrlashga yo‘naltirilgan test topshiriqlarini shakllantirish va milliy sertifikat tizimi bo‘yicha olib borilayotgan ishlar to‘g‘risida to‘xtalib o‘tildi. Shular bilan bir qatorda, yoshlarning test sinovlariga puxta tayyorgarlik ko‘rishi uchun repetitsion (diagnostik) testlardan foydalanishning muhimligi, normativ-huquqiy hujjatlar mazmun-mohiyati tushuntirildi.

Davlat test markazi matbuot xizmati