Yoshlar ishlari agentligi, Yoshlar ittifoqi hamda Xalq ta’limi vazirligi hamkorligida “Iqtidor” loyihasi yo‘lga qo‘yilib, loyiha doirasida 2021-yil 23-25-aprel kunlari Jizzax viloyati, Zomin tumanidagi “Zomin” bolalar oromgohida birinchi “Iqtidor” yoshlar forumi o‘tkazildi.

Forumning e’tiborli tomoni, uning respublikamizdagi Mehribonlik uylari va SOS bolalar shaharchalarida ta’lim olayotgan bitiruvchilar uchun tashkil etilgani va ko‘plab o‘z sohasining yetuk mutaxassislari jalb etilgani bo‘ldi. Loyihada Mehribonlik uylari va SOS bolalar shaharchalarida ta’lim olayotgan yoshlarining jamiyatga ijtimoiy moslashuvi, mustaqil hayotga tayyorlash, oliy ta’lim olishi va kasb tanlashi, huquqiy savodxonligini oshirishida yaqindan yordamlashish maqsad qilingan.

Forum doirasida boshqa soha vakillari bilan bir qatorda, Davlat test markazi mas’ullari ham ishtirok etib, “Bu yil test sinovlari qanday o‘tkaziladi?” mavzusida seminar-trening o‘tkazildi. Ochiq muloqot shaklida o‘tgan seminar-treningda oliy ta’lim muassasalari bakalavriatiga kirish test sinovlariga doir so‘nggi yangiliklar va o‘zgarishlar, bunday toifadagi abituriyentlar uchun joriy etilgan imtiyozlar, imkoniyatlar hamda Davlat test markazi faoliyatiga oid boshqa masalalar yuzasidan ma’lumotlar berildi.

Tadbir yakunida bitiruvchilar ishtirokida diagnostik test sinovlari ham tashkil etildi. Diagnostik test sinovlarini o‘tkazish davomida forum ishtirokchilari o‘z bilimlarini sinash bilan birga, test materiallari bilan ishlash, test sinovi topshirish tartibi bo‘yicha ko‘nikma hosil qildilar.

O‘tkazilgan diagnostik test sinovi natijalari Davlat test markazining my.dtm.uz saytida e’lon qilinadi.

Davlat test markazi matbuot xizmati