Davlat test markazi rahbariyatining navbatdagi sayyor qabullari Surxondaryo viloyatida Davlat test markazi direktori Karimov Madjit Malikovich tomonidan o‘tkazildi.

Qabullar joriy yil 16-dekabr kuni Termiz davlat universiteti akademik litseyi, Termiz tumani “Yangihayot” mahalla fuqarolar yig‘inidagi 1-umumta’lim maktabi va O‘zbekiston Respublikasi Prezidentining xalq qabulxonasida bo‘lib o‘tdi.

Mazkur sayyor qabullarda ishtirok etgan fuqarolarga Davlat test markazi rahbari tomonidan oliy ta’lim olish, malakali va raqobatbardosh kadrlar tayyorlash bo‘yicha amalga oshirilayotgan dolzarb islohotlar samarasi, davlatimiz rahbarining shaxsiy tashabbusi bilan yoshlarning zamonaviy tahsil olishi uchun yaratilayotgan shart-sharoitlar, imkoniyat va imtiyozlar, ularni asoslovchi normativ-huquqiy hujjatlar mazmun-mohiyati, ta’lim sohasida innovatsion g‘oyalarni ro‘yobga chiqarish, yoshlarning bilimga chanqoqligi rag‘batlantirilayotganligi xususida ma’lumotlar taqdim etildi. Shuningdek, Davlat test markazi faoliyatiga tegishli masalalar bilan murojaat qilgan fuqarolar shaxsan qabul qilinib, ko‘tarilgan masalalarni hal qilishga yaqindan yordam berildi.

Shular bilan bir qatorda, Davlat test markazi tomonidan oliy ta’lim muassasalariga o‘qishga kiruvchi abituriyentlar, ularning ota-onalari kirish test sinovlarida yaratilayotgan qulayliklar, keyingi yil tayyorgarligi, kutilayotgan o‘zgarish va yangiliklardan xabardor qilindi.

Davlat test markazi rahbariyati tomonidan joylarda sayyor qabullar tashkil etilishi davom etmoqda.

Davlat test markazi matbuot xizmati