Vazirlar Mahkamasining 2017-yil 20-iyundagi 393-son qarori bilan tasdiqlangan “Oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risida” nizomda maqsadli qabul tartibi belgilangan.

Unga ko‘ra ayrim yo‘nalishlar bo‘yicha hududlar kesimida maqsadli qabul kvotalari tasdiqlangan taqdirda, tanlov har bir hudud bo‘yicha alohida o‘tkaziladi.

Hududlar kesimida maqsadli qabul kvotalari tasdiqlangan ta’lim yo‘nalishlariga qabul muayyan hududda doimiy yashaydigan (pasportdagi ma’lumoti bo‘yicha) abituriyentlar hisobidan amalga oshiriladi.

Amaldagi normativ-huquqiy hujjatlarda abituriyent mazkur hududda muayyan muddat yashagan bo‘lishi kerak degan talab belgilanmagan.

Shu sababli maqsadli kvota uchun tanlov abituriyentning doimiy yashash hududi (pasportdagi ma’lumoti bo‘yicha) asosida amalga oshiriladi.

Abituriyentlarning doimiy yashash manzili Ichki ishlar vazirligining “Manzil” axborot tizimidan olinadi.