Kino san’ati insonlarga o‘zgacha ozuqa va o‘zgacha ruh bag‘ishlaydi. Shu bilan birga, bu san’at turi ma’naviy-ma’rifiy tafakkurni boyitadi, tarbiyalaydi, davolaydi, yuksaklikka olib chiqadi.
Zamonaviy hayotning qaysi davri bo‘lishidan qat’i nazar, yoshlarni tarbiyalashda kino yetakchi o‘rinlardan birida bo‘lib keldi va hozir ham shunday. U adabiyot, madaniyat, ma’naviyat, san’atning bir butunligini tashkil etadi.
2021-yil 7-dekabr kuni Ilhom Sodiqov (rejissyor va aktyor), Abdumannon Ubaydullayev (kinoaktyor), Jahongir Ahmedov (kinorejissyor), Dilorom Karimova (O‘zbekiston xalq artisti, kinoaktrisa) va Anvar Qurbonov (kinoaktyor) kabi miliy kinosanoatning yetuk vakillari bilan Davlat test markazi xodimlari ishtirokida ijodiy uchrashuv bo‘lib o‘tdi.
Tadbirda so‘z olgan D.Karimova kino san’atining keyingi yillardagi yutuqlari, ijobiy o‘zgarishlar, “Ilhaq” filmining qalblardan joy olganligining asosiy sabablari, film orqali o‘zbek xalqining frontda va front ortidagi qahramonlilklari, buyuk matonati hamda haqli ravishda Minsk shahrida bo‘lib o‘tgan xalqaro kinofestivalda gran pri sovriniga sazovor bo‘lganligi haqida batafsil ma’lumot beridi. J.Ahmedov va I.Sodiqov kino sanoatidagi muammo va kamchiliklar, ularni bartaraf etish shartlari, “Ilhaq” filmini suratga olish tarixi, film orqali ko‘rsatishga harakat qilingan O‘zbekiston farzandlarining tabiatan bukilmas irodalari, botirlik, qo‘rqmaslik fazilatlarini to‘lqinlanib gapirib berdilar. O‘z navbatida mashhur kinoaktyor A.Ubaydullayev “Vatan” badiiy filmi haqida, uning yutuqlari to‘g‘risida, suratga olish jarayonlarida uchrab turgan kulgili voqealarni eslatib o‘tdi. Shuningdek, aktyor A.Qurbonov tashrif buyurgan ijodkorlarga faqat kino emas, balki ta’lim-tarbiya sohasining ham vakillari sifatida qarash to‘g‘ri bo‘lishini ta’kidladi.
Butun ijodiy uchrashuv davomida do‘stona ruh hukm surdi. Davlat test markazi xodimlari tomonidan berilgan barcha savollarga mutaxassislar tomonidan batafsil javob berildi. Kino san’atimizga bir xil qarashlik, fikr-mulohaza, takliflar borasida uyg‘unlik muhiti tadbir davomida ustunlik qildi.
Ijodiy uchrashuv tomonlarning bir-birlarini ertangi bayram bilan muborakbod etish, ishlarga, ijodlarga barkamollik tilaklari bilan yakunlandi.
Davlat test markazi matbuot xizmati
