Mamlakatimizda vatanimiz mustaqilligining 31 yilligi keng nishonlanmoqda. Shu munosabat bilan 2022-yil 30-avgust kuni  Davlat test markazida ushbu qutlug‘ sanaga bag‘ishlab, ma’naviy-ma’rifiy tadbir tashkil etildi va unga taniqli siyosiy sharhlovchi sifatida faoliyat yuritgan, bugungi kunda hurmatli jurnalistlardan Quddus A’zamov taklif etildi.

Tadbirda so‘zga chiqqan Quddus A’zam vatanimizning mustaqilligi xalqimizning ma’naviy uyg‘onishi uchun to‘la imkoniyat yaratganligi, asrlar mobaynida orzu bo‘lib kelgan hurlik davrini boshlab berganligi, shuningdek, ushbu davrda yurt tarixi, qadimiy madaniyat tiklana boshlanganligi, xalqning azaliy urf-odatlari, ma’naviy qadriyatlari gullab-yashnaganligi hamda yakkalanish, chegaralanish, taqiqlarga giriftor qilingan vijdon erkinligiga munosabat tubdan o‘zgarganligi to‘g‘risida keng va batafsil ma’lumot berdi.

O‘z navbatida ma’ruzachi va xodimlarning qizg‘in suhbati davomida tamoman yangi davrni boshlab bergan Mustaqillik o‘zbek xalqi tarixida, milliy dunyoqarashida yangicha tafakkur shakllantirgani, bugungi kunda, ayniqsa, ta’lim sohasida amalga oshirilayotgan islohotlar natijasida inqilobiy o‘zgarishlar bo‘layotganligi, shaxs qadri, kasb mohiyati yana ulug‘lanayotganligi, asosiysi, xalq kelajagining tom ma’noda farovonligi ta’minlanayotganligi e’tirof etildi.

Uchrashuv kutilganidek qizg‘in bahs-munozaralarga boy tarzda o‘tdi.

Davlat test markazi axborot xizmati