2021-yilning 1-yarmi davomida sayyor qabullar o‘tkazish rejasiga muvofiq Davlat test markazi rahbariyati tomonidan Markaz faoliyatiga oid masalalar yuzasidan jismoniy va yuridik shaxslarning murojaatlarini ko‘rib chiqish maqsadida sayyor qabullar tashkil etish davom etmoqda.
Reja doirasida 2021-yil 10-11-mart kunlari Davlat test markazi direktori Karimov Madjit Malikovich rahbarligida Davlat test markazining Namangan viloyatidagi bo‘limi xodimlari tomonidan sayyor qabullar o‘tkazildi.
Dastlabki sayyor qabul 10-mart kuni To‘raqo‘rg‘on tumanidagi “Porosmon” mahalla fuqarolar yig‘inida joylashgan 2-umumta’lim maktabida 200 nafardan ortiq o‘quvchilar, fan o‘qituvchilari hamda mahalla faollari ishtirokida bo‘lib o‘tdi. Mazkur sayyor qabul To‘raqo‘rg‘on tuman hokimi Z.Maxkamova, tuman prokurori E.Talaboyev, Namangan viloyati xalq ta’limi boshqarmasi o‘rinbosari Q.Mirzaboyev hamda To‘raqo‘rg‘on tumani xalq ta’limi bo‘limi mudiri F.Bozorov bilan hamkorlikda o‘tkazildi.
Keyingi sayyor qabullar 11-mart kuni Uychi tumanidagi “Shifokor” mahalla fuqarolar yig‘inida joylashgan 6-umumta’lim maktabi va “Yuksalish” mahalla fuqarolar yig‘inida joylashgan 12-umumta’lim maktabida Uychi tuman hokimining o‘rinbosari A.Abduraxmanov hamda Uychi tumani xalq ta’limi bo‘limi mudiri Sh.Muradov bilan hamkorlikda bo‘lib o‘tdi. Unda 330 nafardan ortiq fuqaro – yoshlar, bitiruvchi o‘quvchilar, o‘qituvchilar va ota-onalar ishtirok etdi.
Yoshlar, bitiruvchi o‘quvchilar, o‘qituvchilar, ota-onalar, mahalla faollari va mas’ul shaxslar ishtirokida bo‘lib o‘tgan ushbu tabdirlar ochiq muloqot shaklida o‘tkazildi hamda oliy ta’lim muassasalariga kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlarini shakllantirish va umumta’lim fanlaridan milliy test tizimini joriy etish, shuningdek, sohaga oid qaror va farmonlarning mazmun-mohiyatiga bag‘ishlandi.
Tadbirlar davomida katta qiziqish bilan qatnashgan o‘quvchilar, o‘qituvchilar, ota-onalar, mas’ul shaxslar va boshqalarning savollariga batafsil javob berildi.
Davlat test markazi matbuot xizmati
