O‘zbekiston Respublikasi Vazirlar Mahkamasining 2018 yil 03 apreldagi “Oliy ta'lim muassasalariga o‘qishga qabul qilish tartibini yanada takomillashtirish to‘g‘risida” 261-son qarori bilan tasdiqlangan “O‘zbekiston Respublikasi oliy ta'lim muassasalarining bakalavriatiga o‘qishga qabul qilish uchun kirish test sinovlarini o‘tkazish tartibi to‘g‘risidagi nizom”ga muvofiq joriy yil o‘quv yilida oliy ta'lim muassasalariga qabul bo‘yicha o‘tkaziladigan test sinovlariga tayyorgarlik holati yuzasidan ommaviy axborot vositalari vakillari hamda ular orqali keng jamoatchilikka ma'lumotlar berish maqsadida 2019 yilning 01 iyul kuni Milliy matbuot markazida navbatdagi matbuot anjumani tashkil etildi.

Tadbirda Davlat test markazi direktori o‘rinbosari, boshqarma boshliqlari va bo‘lim boshliqlari ishtirok etdilar hamda ommaviy axborot vositalari vakillarini so‘nggi yangilik va o‘zgarishlar bilan birga, joriy yilda oliy ta'lim muassasalariga qabul bo‘yicha o‘tkaziladigan test sinovlariga tayyorgarlik darajasining bugungi kun holati yuzasidan elektron shakldagi ko‘rgazmali materiallar asosida ma'lumotlar berildi. Jumladan, test sinovlari o‘tkaziladigan binolarni tayyorlash holati, ularni tegishli asbob-uskunalar, vositalar, suv va ruchka bilan ta'minlash, abituriyentlar uchun yetarli shart-sharoitlar yaratish, ota-onalar kutish joylari sharoitlarining nazorati, guruh nazoratchiligi bo‘yicha nomzodlarni saralash, tanlash, shartnoma tuzish hamda test topshiriqlari bazalari, test materiallarini tayyorlash kabi masalalar yuzasidan to‘liq axborot taqdim etildi.
Matbuot anjumani davomida jurnalistlar o‘zlarini qiziqtirgan barcha savollarga batafsil javob oldilar.

Axborot xizmati