2021-yilning 1-yarmi davomida sayyor qabullar o‘tkazish rejasiga muvofiq O‘zbekiston Respublikasi Vazirlar Mahkamasi huzuridagi Davlat test markazi tomonidan tashkil etilayotgan sayyor qabullar davom etmoqda.

Reja doirasida joriy yil 21-yanvar kuni Davlat test markazi direktori o‘rinbosari Batirov Sherzod Negmuratovich va Davlat test markazining Qoraqalpog‘iston Respublikasidagi bo‘limi xodimlari tomonidan Qoraqalpog‘iston Respublikasida sayyor qabullar o‘tkazildi.

Birinchi qabul Nukus shahridagi 46-sonli ixtisoslashtirilgan maktabning majlislar zalida 220 nafardan ortiq fuqaro – yoshlar, bitiruvchi o‘quvchilar, o‘qituvchilar va ota-onalar ishtirokida bo‘lib o‘tdi. Shuningdek, shu kuni Chimboy tumanidagi ToshDAU Nukus filialining akademik litseyi faollar zalida ham navbatdagi uchrashuv tashkil etildi va unda 168 nafar bitiruvchi o‘quvchilar, o‘qituvchilar, ota-onalar, nodavlat ta’lim muassasalarining o‘qituvchilari ishtirok etdi.

Har ikkala tabdir ham ochiq muloqot tarzida o‘tkazildi hamda kirish test sinovlariga oid eng so‘nggi yangilik, kiritilishi kutilayotgan o‘zgarishlar, test sinovi o‘tkazish jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlarini shakllantirish va umumta’lim fanlaridan milliy test tizimini joriy etish, shuningdek, Davlat test markazi faoliyatini tartibga soluvchi yangi normativ-huquqiy hujjatlar sharhi, mazmun-mohiyatiga bag‘ishlandi.

Qiziqarli va qizg‘in musohaba tarzida o‘tgan uchrashuvlar davomida o‘quvchilar va o‘qituvchilar, nodavlat ta’lim muassasa rahbarlari, ota-onalar tomonidan berilgan savollarga mavjud me’yoriy-huquqiy hujjatlar asosida, batafsil javob qaytarildi hamda ishtirokchilar tomonidan bildirilgan fikr-mulohazalar, takliflar o‘rganib chiqilishi aytildi.

Davlat test markazi matbuot xizmati