2021-yil 6-7-may kunlari Buxoro viloyatida umumiy o‘rta ta’lim maktablari, akademik litseylar hamda kasb-hunar maktablarining o‘quvchilari o‘rtasida matematika, kimyo va biologiya fanlaridan Fan olimpiadasining IV (respublika) bosqichi o‘tkazilgan edi.

Fan olimpiadasining respublika bosqichi 22-23-may kunlari davom ettirilib, Navoiy viloyatida qoraqalpoq tili va adabiyoti, rus tili (ta’lim o‘zbek va qardosh tillarda), rus tili va adabiyoti (ta’lim rus tilida) hamda qozoq tilidan, Namangan viloyatida esa fizika, tarix hamda informatika va axborot texnologiyalari fanlaridan o‘tkazildi.

Fan olimpiadasining test sinovi qismi Davlat test markazi tomonidan o‘tkazilib, talabgorlarga 30 ta test topshirig‘i (20 ta yopiq va 10 ta ochiq turdagi) va test topshiriqlarini bajarish uchun fanning xususiyatlaridan kelib chiqqan holda 1 soat yoki 1 soat-u 30 daqiqa vaqt ajratildi.

Unda yuqorida qayd etilgan fanlar bo‘yicha Qoraqalpog‘iston Respublikasi, viloyatlar va Toshkent shahridan jami 192 nafar talabgor ishtirok etib, g‘oliblik uchun kurash olib bordi.

Ma’lumot uchun, qolgan fanlardan Fan olimpiadasining respublika bosqichi 29-30-may kunlari Samarqand viloyati va Toshkent shahrida o‘tkaziladi.

Mazkur olimpiadalarda 1-3-o‘rinni egallagan ishtirokchilar ixtisoslik fani bo‘yicha davlat oliy ta’lim muassasalariga kirish imtihonlarida maksimal ball olish huquqini beruvchi sertifikatga ega bo‘ladilar.

Davlat test markazi matbuot xizmati