2021-yil 26-fevral kuni maktab o‘quvchilari uchun Davlat test markaziga ekskursiya tashkil etildi.
Tadbirga Olmazor tumanida joylashgan 102- va 106-son zaif eshituvchi bolalar uchun ixtisoslashtirilgan maktab-internatlari bitiruvchilari, surdo tarjimonlar hamda Sergeli tumanidagi 2-umumiy o‘rta maktab bitiruvchilari tashrif buyurdilar.
Tadbir soat 10:00 da Davlat test markazi rahbariyatining kirish so‘zi bilan boshlandi.
Bitiruvchi yoshlar ishtirokida o‘tkazilgan mazkur tadbirning avvalida sohaga oid va Davlat test markazi faoliyatini tartibga soluvchi normativ-huquqiy hujjatlar, “Yoshlarni qo‘llab-quvvatlash va aholi salomatligini mustahkam yili”da kirish test sinovlariga oid eng so‘nggi yangiliklar, kutilayotgan o‘zgarishlar, jamoatchilik muhokamasiga qo‘yilayotgan qarorlar loyihalari sharhi, mazmun-mohiyatiga bo‘yicha ma’lumotlar berildi, test sinovi topshirish tartibiga bag‘ishlangan videoroliklar namoyish etildi.
Shundan so‘ng bitiruvchi yoshlar ishtirokida diagnosik test sinovi o‘tkazildi. Bu jarayonda oliy ta’lim muassasalariga kirish test sinovi o‘tkazish tartibi, abituriyent vazifalari batafsil tushuntirildi.
Test sinovi tugagach, bitiruvchilar va o‘qituvchilar doimiy yopiq rejimda bo‘lgan binoda faoliyat olib boruvchi boshqarma va bo‘limlar ishlari jarayonini ko‘rish uchun taklif etildilar. Xususan, u yerda mas’ullar tomonidan test sinovlari uchun test topshiriqlarini shakllantirish, generatsiyalash, kitoblarni nashr etish va manzillari bo‘yicha jo‘natish, qabul qilish hamda Davlat test markaziga olib kelingan javoblar varaqalari asosida natijalarni hisoblash jarayonlari bilan yaqindan tanishtirildi. Shu bilan birga, test sinovida ishtirok etgan bitiruvchi o‘quvchilarning test natijalari chiqarilib, qo‘llariga berildi va bu jarayon joyida to‘liq ko‘rsatildi. Tadbir bolalarda katta qiziqish uyg‘otdi.
Yakunda bolalarni qiziqtirgan savollarga batafsil javob berildi va ularning har biriga sovg‘a sifatida test topshiriqlari to‘plami kitoblari berildi.
Maktab-internatlar bitiruvchilari Davlat test markaziga maxsus avtobusda olib kelindi va tadbirdan so‘ng maktablarga yetkazib qo‘yildi.
Davlat test markazi matbuot xizmati
