O‘zbekiston Respublikasi Prezidentining 2017 yil 16 noyabrdagi PQ-3389-son qarorida belgilangan vazifalarni bajarish maqsadida joriy yilning 29 oktyabr – 5 noyabr kunlarida Yaponiyaning Tokio va Sukuba shaharlariga Davlat test markazi delegatsiyasi tajriba almashish uchun yuborildi.

Delegatsiya belgilangan vazifalarni o‘z vaqtida va sifatli bajarish maqsadida Yaponiya oliy ta'lim muassasalariga kirish sinovlarini o‘tkazish tartibi bilan tanishdi. Jumladan, Yaponiyaning Universitetlarga kirish imtihonlarini o‘tkazish milliy markazi, Toyo universiteti, Keyo universiteti, Sukuba universiteti, Vaseda universiteti, Tokio xorijiy tadqiqotlar universitetida uchrashuvlar o‘tkazildi.

Osiyo taraqqiyot banki institutining direktori Nayoku Yoshino bilan ham uchrashuv o‘tkazildi va professor Yoshinoning taklif va mulohazalari o`rganildi. Shuningdek, uchrashuvlar tashkil qilingan barcha tashkilotlarda kirish sinovlari o‘tkazish tartibi to‘g‘risida ma'lumotlar eshitildi.

O‘z o‘rnida Davlat test markazi va uning funksional vazifalari to‘g‘risida batafsil ma'lumotlar berildi.

Taraflar o‘zi qiziqtirgan savollarga to‘liq javoblar olishdi. Tomonlar aloqalarni mustahkamlash xohishini bildirdilar. 

Ikkala mamlakatda ham kirish imtihonlari tizimi bir-biriga juda o‘xshashligi va ikki davlatda ham test markazlari faoliyat yuritishi diqqatga sazovor.

Yaponiya tizimini o‘rganish O‘zbekiston Respublikasi oliy ta'lim muassasalariga kirish sinovlari sifatini yanada oshirishga hamda sinovlar adolatli, haqqoniy va shaffof o‘tishiga katta hissa qo‘shishiga ishonamiz.