2022-jıl 24-fevral kúni Mámleketlik test orayında gezektegi «Ashıq esikler kúni» shólkemlestirildi. Onda 100-sanlı tayanısh háreketinde nuqsanı bar bolǵan balalar ushın arnawlı mektep internatı, 101-, 102- hám 106-sanlı esitpeytuǵın hám shala esitiwshi balalar ushın arnawlı mektep internatları hám «Mehirli qollar» imkaniyatı sheklengen jaslar hám balalar orayı pitkeriwshileri, sonlay-aq, ǵalaba xabar quralları wákilleri qatnastı.
Ilajdı Mámleketlik test orayı direktorı orınbasarı Radjabov Sardor Baxtiyorovich kiris sóz benen ashtı hám qatnasıwshılardı ilaj baǵdarlaması menen tanıstırdı.
Ilajdan aldın oqıw orınlarına kiriw test sınaqlarına tiyisli eń sońǵı jańalıqlar, kútilip atırǵan ózgerisler, test sınaǵı processlerin ápiwayılastırıw, test tapsırıwshılar ushın jánede keńirek imkaniyat, qolaylıqlarǵa tiykarlanǵan sharayatlar jaratıw, logikalıq pikirlewge baǵdarlanǵan test tapsırmalarınan keńirek paydalanıw, ulıwma bilim beriw pánlerinen milliy test sisteması, sonday-aq, Mámleketlik test orayınıń aymaqlarda qurılıwı rejelestirilgen imaratları, olardan paydalanıw imkaniyatları boyınsha tolıq maǵlıwmatlar hám videorolikler qoyıp berildi.
Baǵdarlama boyınsha, pitkeriwshi jaslar test sınaqlarına tayarlıqlar kóriw, ótkeriw hám muwapıqlastırıwdı ámelge asırıwshı basqarma hám bólimler, shet tilin biliw dárejesin bahalaw basqarması jumısı menen jaqınnan tanıstırıldı. Bunnan soń olar turaqlı, arnawlı jabıq rejimdegi imaratta jumıs alıp barıwshı basqarma hám bólimler jumısları menen tanısıw, processlerdi óz kózleri menen kóriw ushın mirát etildi. “Ashıq esikler kúni”ne kelgenler test tapsırmaların qáliplestiriw, kitaplardı baspadan shıǵarıw hám mánzilleri boyınsha jiberiw, qabıl qılıw hám de Mámleketlik test orayına alıp kelingen juwaplar betleri tiykarında nátiyjelerdi esaplaw processlerin óz kózleri menen kórip, tolıq maǵlıwmatqa iye boldı.
Mámleketlik test orayı tárepinen ámelge asırılıp atırǵan jumıs túrleri, avtomatlastırılǵan processler qatnasıwshılarda úlken qızıǵıwshılıq oyattı. Ilaj dawamında pitkeriwshiler hám jurnalistlerdi qızıqtırǵan barlıq sorawlarǵa ámeldegi processler arqalı kórsetilgen halda tolıq juwaplar berildi.
