Oliy Majlis Nızamshılıq palatasınıń deputatı Doniyor Ǵaniyev 2022-jıl 14-mart kúni óziniń telegram kanalında Esap palatasınıń 2021-jılǵı jumısı boyınsha bergen esabatında usı kúnlerde Oliy Majlis Nızamshılıq palatası deputatları tárepinen kórip shıǵılıp atırǵanı haqqında xabar berdi.

Onda joqarı oqıw orınlarına qosımsha asırılǵan tólew-kontrakt tiykarında (xalıqtıń tilinde “super-kontrakt”) oqıwǵa qabıl etilgen studentlerdiń hújjetleri úyrenilgende, 10 joqarı oqıw orınlarında 117 studenttiń Mámleketlik test orayı maǵlıwmatnamasındaǵı balların qálbekilestiriw arqalı olardıń “super-kontrakt” summalarınıń muǵdarı jámi 9,6 mlrd. sumǵa kem esaplanǵanı aytılǵan.

Bul xabar kópshilik tárepinen nadurıs talqılanbaqta hám dizimdegi (Mámleketlik test orayı maǵlıwmatnaması) ballar Mámleketlik test orayı tárepinen qálbekilestirilgen, degen pikirge barmaqta.

Usı jaǵday boyınsha tómendegilerdi málim etemiz. Hár jılı joqarı oqıw orınlarınıń bakalavriat tálim baǵdarlarına kiriw test sınaqları juwmaqlanǵanınan soń test nátiyjeleri Mámleketlik komissiyası tárepinen tastıyıqlanadı hám Mámleketlik test orayınıń rásmiy veb-saytında jariyalanadı hám de hár bir joqarı oqıw orınları kesiminde test sınaǵı dizimi joqarı oqıw orınlarına jetkeriledi.

Joqarı oqıw orınları usı dizim tiykarında abituriyentlerdi oqıwǵa qabıl etiw jumısların alıp baradı.

Abituriyentlerdi asırılǵan tólew-kontrakt (xalıqtıń tilinde “super-kontrakt”) tiykarında oqıwǵa qabıl etiw processinde Mámleketlik test orayı qatnaspaydı. Joqarı oqıw orınları  abituriyenttiń arzası hám test sınaǵında toplaǵan balı boyınsha asırılǵan tólew-kontrakt tiykarında oqıwǵa qabıllaydı.

Deputat Doniyor Ǵaniyevtiń xabarına anıǵıraq itibar qaratılsa, “…Mámleketlik test orayı maǵlıwmatnamasındaǵı balların qálbekilestiriw arqalı…” dep aytılǵan. Yaǵnıy basqalar tárepinen Mámleketlik test orayı maǵlıwmatnaması (dizimindegi) daǵı ballar qálbekilestirilgen, dep aytılǵan.

Qosımsha sıpatında usını málim etemiz, Mámleketlik test orayı ashıqlıq hám ádalatlıq táreptarı bolıp, test processinde ashıqlıq hám ádalatlıqtı támiynlew hám de abiturientlerge qolaylıq jaratıw maqsetinde mandat.dtm.uz saytı iske túsirilgen.

Usı saytta ID nomeri arqalı qálegen abituriyenttiń test sınaǵında toplaǵan balı hám basqa maǵlıwmatların kóriw múmkin.

Mámleketlik test orayınıń málimleme xızmeti