“Davlat test markazi rahbariyati tomonidan 2021-yilning 1-yarmi davomida jismoniy va yuridik shaxslarni joylarda qabul qilish bo‘yicha sayyor qabullarni o‘tkazish jadvali” asosida joylarda sayyor qabullar tashkil etilmoqda.

Navbatdagi sayyor qabullar 2021-yil 16-17-fevral kunlari Davlat test markazi direktori M.Karimov tomonidan Sirdaryo va Jizzax viloyatlarida Davlat test markazining mazkur viloyatlardagi bo‘limlari xodimlari ishtirokida o‘tkazildi.

Dastlab sayyor qabullar 16-fevral kuni Sirdaryo viloyati bo‘yicha Sayxunobod tumanidagi “Baxmalsoy” mahalla fuqarolar yig‘ini va Sirdaryo tumanidagi “Dehqonobod” mahalla fuqarolar yig‘inida bo‘lib o‘tdi.

Sayyor qabullar 17-fevral kuni Jizzax viloyatida davom ettirilib, G‘allaorol tumanidagi “Guliston” qishloq fuqarolar yig‘ini va “Ko‘kgumbaz” mahalla fuqarolar yig‘inida hamda Paxtakor tumanidagi “Buyuk ipak yo‘li” qishloq fuqarolar yig‘inida tashkil etildi.

Mazkur tadbirlar davomida O‘zbekiston Respublikasi Prezidentining farmon va qarorlari hamda Vazirlar Mahkamasining qarorlari asosida 2020-yilda ta’lim muassasalariga qabul test sinovlarida abituriyentlarni qo‘llab-quvvatlash va yanada keng imkoniyatlar yaratish maqsadida test sinovlari jarayonlarining soddalashtirilganligi va qulay shart-sharoitlar yaratilganligi to‘g‘risida ma’lumotlar berildi.

Shuningdek, joriy yil qabulida o‘tkaziladigan kirish test sinovlarida rejalashtirilayotgan yangiliklar va o‘zgarishlarga alohida e’tibor qaratildi.

Qabullar jarayonida fuqarolar tomonidan fikr-mulohazalar va takliflar bildirildi.

Fuqarolarning murojaatlari shaxsan ko‘rib chiqilib, murojaatchilarning savollariga tegishli me’yoriy-huquqiy hujjatlar asosida batafsil javob berildi.

Davlat test markazi matbuot xizmati