Hududlarda Davlat test markazi rahbariyatining sayyor qabullari davom etmoqda.

Avval xabar qilinganidek, 22-dekabr kuni navbatdagi sayyor qabullar Andijon viloyatida Davlat test markazi direktori Karimov Madjit Malikovich tomonidan va Namangan viloyatida bosh boshqarma boshlig‘i Mirzayev Farhod Isamovich tomonidan o‘tkazildi.

Qabullar Andijon viloyatida Andijon davlat universiteti va Prezident xalq qabulxonasida hamda Namangan viloyatida Prezident xalq qabulxonasi va Namangan shahridagi 52-umumta’lim maktabida bo‘lib o‘tdi.

Mazkur sayyor qabullar davomida Davlat test markazi faoliyatiga tegishli masalalar bilan murojaat qilgan fuqarolar shaxsan qabul qilinib, ko‘tarilgan masalalarni hal qilishga yaqindan yordam berildi. Shuningdek, tadbirda ishtirok etgan fuqarolarga oliy ta’lim olish, malakali va raqobatbardosh kadrlar tayyorlash bo‘yicha amalga oshirilayotgan dolzarb islohotlar samarasi, davlatimiz rahbarining shaxsiy tashabbusi bilan yoshlarning zamonaviy tahsil olishi uchun yaratilayotgan shart-sharoitlar, imkoniyat va imtiyozlar, ularni asoslovchi normativ-huquqiy hujjatlar mazmun-mohiyati, ta’lim sohasida innovatsion g‘oyalarni ro‘yobga chiqarish, yoshlarning bilimga chanqoqligi rag‘batlantirilayotganligi xususida ma’lumotlar taqdim etildi.

Ayniqsa, test sinovlarida ishtirok etish uchun onlayn ro‘yxatdan o‘tish tartib-qoidalari, umumta’lim fanlarini bilish darajasini baholashning milliy test tizimi va 2022-2023-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari formatidagi diagnostik test sinovlarining 2022-yil yanvar oyidan boshlab yo‘lga qo‘yilishi yoshlarda katta qiziqish uyg‘otdi.

Ishtirokchilarning barcha savollariga batafsil va asosli javob berildi. Yakunda eng yaxshi savol bergan o‘quvchilarga kitoblar sovg‘a qilindi.

Davlat test markazi matbuot xizmati