Vazirlar Mahkamasi huzuridagi Davlat test markazi tomonidan joriy yilda amalga oshirilayotgan ishlar, amaldagi qaror va farmonlarning mazmun-mohiyati bilan tanishtirish, yoshlar va ota-onalarning murojaatlarini joylarda o‘rganish maqsadida sayyor qabullar o‘tkazilmoqda.

Ana shunday tadbirlar 2021-yil 3-fevral kuni Samarqand viloyatining Jomboy va Toyloq tumanlarida bo‘lib o‘tdi.

Davlat test markazi direktori o‘rinbosari Sh. Batirov rahbarligida Davlat test markazining Samarqand viloyati bo‘limi xodimlari bilan Jomboy tuman 10-son Bolalar musiqa va san’at maktabi faollar zalida hamda Toyloq tumani, Jumabozor qishlog‘ida joylashgan 60-umumta’lim maktabi faollar zalida tashkil etilgan mazkur tadbirlarda viloyat Xalq ta’limi boshqarmasi, Jomboy va Toyloq tumanlari xalq ta’limi rahbariyati, shuningdek, umumta’lim maktablari rahbarlari, o‘qituvchilar, o‘quvchilar hamda mahalla faollari ishtirok etdi.

Sayyor qabulda Davlat test markazi mas’ullari tomonidan asosiy e’tibor O‘zbekiston Respublikasi Prezidenti va Vazirlar Mahkamasining ta’lim muassasalariga qabul test sinovlarining adolatliligi va shaffofligini ta’minlash, test topshiruvchilar uchun yanada keng shart-sharoit va imkoniyatlar yaratish bo‘yicha qabul qilingan farmon va qarorlarining mazmun mohiyatini tushuntirishga qaratildi.

Shu bilan birga, joriy yil oliy ta’lim muassasalarining bakalavriat ta’lim yo‘nalishlariga qabul test sinovlarini soddalashtirish, test sinovlarini o‘tkazish bo‘yicha o‘zgarish va yangiliklar, tegishli vazirlik va idoralar hamkorligida bu borada amalga oshirilayotgan ishlar mohiyati va shu kabi masalalarga qiziqish yuqori bo‘ldi.

Davlat test markazi matbuot xizmati