2021-yilning 1-yarmi davomida sayyor qabullar o‘tkazish rejasiga muvofiq O‘zbekiston Respublikasi Vazirlar Mahkamasi huzuridagi Davlat test markazi tomonidan joylarda tashkil etilayotgan sayyor qabullar davom etmoqda.
Reja doirasida joriy yil 26-27-yanvar kunlari Davlat test markazi direktori o‘rinbosari Radjabov Sardor Baxtiyorovich rahbarligida Davlat test markazining Buxoro va Sirdaryo viloyatlaridagi bo‘limlari xodimlari tomonidan sayyor qabullar o‘tkazildi.
Dastlabki sayyor qabul 26-yanvar kuni Buxoro viloyatidagi Buxoro tibbiyot instituti akademik litseyida 250 nafardan ortiq o‘quvchilar va fan o‘qituvchilari ishtirokida bo‘lib o‘tdi.
Keyingi sayyor qabul 27-yanvar kuni Sirdaryo viloyatida Oqoltin tumanidagi Sardoba madaniyat saroyida Oqoltin tumani hokimi D.Fozilov va viloyat xalq ta’limi boshqarmasi boshlig‘i o‘rinbosari J.Rasulov bilan hamkorlikda o‘tkazildi. Unda 340 nafardan ortiq fuqaro – yoshlar, bitiruvchi o‘quvchilar, o‘qituvchilar va ota-onalar ishtirok etdi.
Shuningdek, shu kuni Mirzabod tumanidagi 17-umumta’lim maktabida ham 100 nafardan ortiq bitiruvchi o‘quvchilar, o‘qituvchilar hamda ota-onalar ishtirokida sayyor qabul tashkil etildi. Mazkur sayyor qabul Mirzaobod tumani hokimi J.Yariyev va viloyat xalq ta’limi boshqarmasi boshlig‘ining birinchi o‘rinbosari O.Mirbaratov bilan hamkorlikda o‘tkazildi.
Yoshlar, bitiruvchi o‘quvchilar, o‘qituvchilar, ota-onalar va mas’ul shaxslar ishtirokida bo‘lib o‘tgan uchchala tabdir ham ochiq muloqot shaklida o‘tkazildi hamda oliy ta’lim muassasalariga kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlarini shakllantirish va umumta’lim fanlaridan milliy test tizimini joriy etish, shuningdek, sohaga oid qaror va farmonlarning mazmun-mohiyatiga bag‘ishlandi.
Tadbirlar davomida ishtirokchilar tomonidan berilgan savollarga batafsil javob qaytarildi hamda bildirilgan fikr-mulohazalar, takliflar o‘rganib chiqilishi, keyinchalik faoliyat davomida foydalanilishi aytildi.
Sayyor qabuldan so‘ng, Davlat test markazi direktori o‘rinbosari S.Radjabov Mirzaobod tumanidagi 17-maktab o‘quvchilari Davlat test markazining e-Sinov va diagnostik test sinovlari xizmatlaridan foydalangan holda o‘z bilimlarini mustahkamlab borayotganliklari bilan ham tanishdi.
Davlat test markazi matbuot xizmati
