Davlat test markazi rahbariyati tomonidan 2021-yilning 1-yarmi uchun belgilangan sayyor qabullar o‘tkazish rejasiga muvofiq Qoraqalpog‘iston Respublikasi va viloyatlarda Markaz faoliyatiga oid masalalar yuzasidan jismoniy va yuridik shaxslarning murojaatlarini ko‘rib chiqish maqsadida sayyor qabullar tashkil etish davom etmoqda.
Navbatdagi sayyor qabul Davlat test markazi direktori o‘rinbosari Batirov Sherzod Negmuratovich tomonidan Surxondaryo viloyati Sho‘rchi tumanida 200 nafardan ziyod o‘quvchilar, maktab direktor o‘rinbosarlari hamda mahalla faollari ishtirokida bo‘lib o‘tdi.
Mazkur sayyor qabul Davlat test markazining Surxondaryo viloyati bo‘limi tomonidan Surxondaryo viloyat Xalq ta’limi boshqarmasi boshlig‘i Hamidova Suluv Yangiboyevna va Sho‘rchi tuman Xalq ta’limi bo‘limi mudiri Xurramov Zikirali Ismatullayevich bilan hamkorlikda o‘tkazildi.
Yoshlar, bitiruvchi o‘quvchilar, o‘qituvchilar, ota-onalar va mas’ul shaxslar ishtirok etgan mazkur qabullar Prezidentimizning sohaga oid qarorlari, famonlari, Oliy Majlis deputatlari va xalqqa murojaatnomasi, “Yoshlarni qo‘llab-quvvatlash va aholi salomatligini mustahkamlash yili”da qabul qilingan Davlat dasturidan kelib chiqqan holda kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlaridan kengroq foydalanish, umumta’lim fanlaridan milliy test tizimini joriy etish, shuningdek, Davlat test markazi faoliyatini tartibga soluvchi normativ-huquqiy hujjatlar, qarorlar loyihalari sharhi, mazmun-mohiyatiga bag‘ishlandi.
Tadbir davomida katta qiziqish bilan qatnashgan o‘quvchilar, o‘qituvchilar, ota-onalar, mas’ul shaxslar va boshqalarning savollariga batafsil javob berildi.
Shuningdek, shu kuni Davlat test markazi tomonidan o‘tkazilgan diagnostik test sinovlarida eng yuqori natija ko‘rsatib, tanlov g‘olibiga aylangan Surxondaryo viloyati Sho‘rchi tumanidagi 13-son ayrim fanlar chuqur o‘rganiladigan maktab internati o‘quvchisi Bo‘riyeva Navro‘zaxon Abdug‘affor qizi mobil telefon va boshqa esdalik sovg‘alar bilan taqdirlandi.
Davlat test markazi matbuot xizmati
