2022-yil 27-sentabr kuni O‘zbekiston milliy universitetida Maktabgacha, Xalq taʼlimi hamda Oliy va oʻrta maxsus taʼlim vazirliklari shuningdek, Prezident taʼlim muassasalari agentligi, Taʼlim sifatini nazorat qilish davlat inspeksiyasi hamda Davlat test markazi vakillari ishtirokida ommaviy qabul o‘tkazildi.

Mazkur ommaviy qabul aholi bilan to‘g‘ridan-to‘g‘ri muloqot tizimini yanada takomillashtirish, fuqarolar muammolari bilan ishlashni samarali tashkil etish, ta’lim sohasida yechimini kutayotgan masalalarni o‘rgangan holda joyida, tezkor hal etish maqsadida tashkil etildi.

Unda boshqa tashkilotlar vakillari bilan birga Davlat test markazi direktorining o‘rinbosari S.Radjabov, bosh boshqarma boshlig‘i F.Mirzayev va bo‘lim boshlig‘i G.Shamshiyevalar ishtirok etdilar.

Ommaviy qabul davomida Davlat test markazi faoliyatiga oid masalalar yuzasidan fuqarolar ochiq va to‘g‘ridan-to‘g‘ri muloqot muhitida qabul qilindi. Shuningdek, ta’lim muassasalariga kirish test sinovlari, abituriyentlar uchun yaratilgan qulaylik va imkoniyatlar, imtiyozlar va ularni qo‘llash tartibi, natijalarni e’lon qilish hamda apellatsiya jarayonlari bo‘yicha aholi murojaatlari yuzasidan batafsil tushuntirish ishlari olib borildi.

Davlat test markazi axborot xizmati