2018 yil 8 noyabr kuni Oʻzbekiston Milliy matbuot markazida 2018-2019 oʻquv yili oliy harbiy va oliy taʼlim muassasalariga qabul uchun oʻtkazilgan test sinovlari yakunlari tahlili va istiqbol rejalariga bagʻishlangan navbatdagi matbuot anjumani boʻlib oʻtdi.

Matbuot anjumanida Davlat test markazi xodimlari tomonidan joriy oʻquv yili uchun oxirgi tahlillar, koʻrsatkichlar taqdim etildi. Shuningdek, test sinovi oʻtkazish jarayoni davomida yutuqlar bilan bir qatorda, yuzaga kelgan xato va kamchiliklar tilga olindi. 

Respublika oliy taʼlim muassasalariga kirish test sinovlarida qoʻllanilgan bu yilgi tizim keyingi yillarda ham har tomonlama bilimli, iqtidorli yoshlarni oliy taʼlim muassasalariga kirib taʼlim olishlarida takomillashtirilgan holda joriy etilishi, test sinovini oʻtkazish shakli va usullarini takomillashtirish, abituriyentlar va ularning ota-onalari uchun yetarli qulay sharoitlar yaratish, shuningdek, meʼyoriy-huquqiy hujjatlarda qayd etilmay qolgan tartiblar, masalan, test sinovi kuni uzrli sabablar bois ishtirok eta olmaganlik, kechikib kelishlik, texnik xatoga yoʻl qoʻyilganligi uchun natija chiqarilmagan test materiallari taqdiriga oydinlik kiritishlik, taʼlim muassasalarini avval bitirganlar bilan shu yili bitirganlarni turkumlash va boshqalarni kiritishga qaratilgan oʻzgarishlar va yangiliklar boʻyicha ishlar olib borilayotganligi eʼtirof etildi. 

Ommaviy axborot vositalari vakillarini qiziqtirgan barcha savollarga batafsil javob berildi.
Matbuot anjumani qiziqarli va qizgʻin munozaralarga boy tarzda oʻtdi.

Axborot xizmati