2018 yil 17-18 may kunlari Davlat test markazida “Oliy ta'lim muassasalari bakalavriatiga qabul test sinovlari uchun umumta'lim fanlari bo‘yicha test topshiriqlari bazasini shakllantirishning dolzarb muammolari” mavzusida davra suhbati bo‘lib o‘tdi. Unda o‘rta maxsus, kasb-hunar ta'limi va xalq ta'limi tizimidan 70 nafardan ortiq biologiya va kimyo fanlari o‘qituvchilari hamda mutaxassislar ishtirok etdi.

Ushbu davra suhbatida Davlat test markazi mutaxassislari tomonidan oliy ta'lim muassasalari bakalavriatiga qabul test sinovlarini o‘tkazish uchun biologiya hamda kimyo fanlari mazmunining tarkibi, abiturientlar tayyorgarlik darajasiga qo‘yiladigan talablar kodifikatori va test topshiriqlari tafsilotlari taqdimoti amalga oshirildi.

Tadbir davomida 2018-2019 o‘quv yili uchun oliy ta'lim muassasalari bakalavriatiga qabul test sinovlarida biologiya va kimyo fanlaridan qo‘llaniladigan test topshiriqlari muhokama qilindi. Shu bilan birga, bugungi kundagi test topshiriqlarini shakllantirish bo‘yicha xalqaro tajribalar va testologiyadagi yangiliklar to‘g‘risida keng ma'lumot berildi.

Axborot xizmati