Davlat test markazi hamda “DAVR PRESS” nashriyot-matbaa uyi hamkorligida 2019-yildan boshlab umumta’lim fanlaridan test topshiriqlari to‘plamlarini chop etish yo‘lga qo‘yilgan edi. Bugunga qadar 2019- va 2020-yillarda oliy ta’lim muassasalariga kirish test sinovlarida foydalanilgan test topshiriqlari umumta’lim fanlari bo‘yicha to‘plam holida nashr etildi.

To‘plamlar o‘qituvchilar, oliy ta’lim muassasalariga kirish uchun tayyorgarlik ko‘rayotgan abituriyentlar va keng jamoatchilik uchun mo‘ljallangan bo‘lib, asosan foydalanuvchilarning puxta tayyorgarlik ko‘rishi, bilimini yuksaltirishi va mustahkamlashida ko‘mak sifatida taqdim etilgan.

Keyingi kunlarda 2020-yilda foydalanilgan test topshiriqlari to‘plamlarida ba’zi xatoliklar uchrayotganligi to‘g‘risida ayrim internet nashrlari tomonidan ma’lumotlar tarqatildi. Shularni hisobga olib, Davlat test markazi mutaxassislari va “DAVR PRESS” nashriyot-matbaa uyi vakillari ishtirokida chop etilgan to‘plamlar tekshiruvdan o‘tkazildi. Tekshiruv natijasida test topshiriqlarini to‘plam holida shakllantirish va chop etish davrida noto‘g‘ri texnik yondashuv bo‘lganligidan xatolik ketganligi, shuningdek, taqdim etilgan ma’lumotlarda ba’zi noaniqliklar bo‘lganligi aniqlandi.

Aniqlangan kamchiliklarni bartaraf etish uchun to‘plamlar qayta ko‘rib chiqilishi va to‘g‘rilanishi bo‘yicha kelishildi. O‘z navbatida, “DAVR PRESS” nashriyot-matbaa uyi tomonidan to‘plamlar xato va kamchiliklar bartaraf etilgan holda nashr etilishi bildirildi.