2020-jıl 6-noyabrde Ózbekstan Respublikası Prezidentiniń “Bilim-tárbiya sistemasın jáne de jetilistiriwge tiyisli qosımsha is-ilajlar haqqında” PQ-4884-sanlı qararı qabıl etilgen edi.

Qarardıń 9-bántinde 2021-jıl 1-yanvardan baslap mámleketlik joqarı bilimlendiriw mekemelerine kiriw ushın test sınawı tapsırmaların dúziw hám ekspertizadan ótkeriwdiń jańa tártibi engiziliwi belgilengen.

Bul qararda belgilengen wazıypalardıń orınlanıwın sapalı támiyinlew maqsetinde Mámleketlik test orayında Ózbekstan Respublikası Ilimler akademiyası (13), Xalıq bilimlendiriw ministrligi (35), Joqarı hám orta arnawlı bilimlendiriw ministrligi (14) hám de Mámleketlik test orayı (22) xızmetkerleri qatnasında jıynalıs bolıp ótti.

Jıynalısta tarawlar boyınsha jámi 84 qánige qatnasıp, kún tártibindegi máseleler toparlarǵa: shet tili (inglis, nemec, francuz tilleri), ana tili hám ádebiyat (ózbek, rus hám qaraqalpaq tilleri), fizika hám matematika, tariyx hám geografiya, ximiya hám biologiya pánlerine bólingen halda talqılandı.

Mámleketlik test orayı qánigeleri tárepinen ulıwma orta bilimlendiriw sistemasındaǵı pánlerdiń oqıw baǵdarlamalarına sáykeslestirilgen halda, logikalıq pikirlew, másele hám mısallardı orınlay alıw qábileti hám bilimlendiriwdiń keyingi basqıshına tayarlıǵın bahalaytuǵın, kompetenciyaǵa tiykarlanıp islep shıǵılǵan test tapsırmaları hám pán mazmunı joybarı taraw qánigeleri tárepinen keń talqılanıp, másele boyınsha usınıs hám pikirler bildirildi.

Talqılawlar nátiyjesinde joqarı bilimlendiriw mekemeleriniń bakalavriat bilimlendiriw baǵdarlarına kiriwshiler ushın test sınawları ótkeriletuǵın pánler mazmunınıń quramı hám test tasırmaların tayarlaw talapları qayta islep shıǵıldı.

Usı islep shıǵılǵan pán specifikaciyaları tiykarında test tapsırmaları bazasın jaratıw, jańa test tapsırmaların dúziw jumısları ámelge asırılmaqta.

Mámleketlik test orayı xabar xızmeti