2019/2020-o‘quv yilida Davlat test markazida mavjud test topshiriqlarini keng jamoatchilik uchun ochiqligi ta’minlash yuzasidan olib borilayotgan ishlarga bag‘ishlangan brifing o‘tkazildi.

Tadbir 2019-yil 15-noyabr kuni soat 11:00 da Axborot va ommaviy kommunikatsiyalar agentligida tashkil etildi. Unda Davlat test markazi mutaxassislari Farhod Mirzayev, Jambul Yusupov, Orziqul Boboyev va Jamshidbek Odilov ishtirok etdi.

Brifing davomida Davlat test markazi tomonidan joriy yilda oliy ta’lim muassasalarining bakalavriat ta’lim yo‘nalishlariga qabul uchun o‘tkazilgan test sinovlarida foydalanilgan test topshiriqlari asosida savollar to‘plamlari nashr etilayotganligi, ushbu to‘plamlar barcha umumta’lim fanlari kesimida mavzulashtirilgan holda tayyorlanganligi, noyabr oyining yakuniga qadar barcha hududlarga tarqatilishi, keyingi o‘quv yilidan joriy etilayotgan majburiy fanlarga doir shakllantirilgan test topshiriqlari keng miqyosda aprobatsiyadan o‘tkazilganligi, shuningdek, test topshiriqlarining ochiqligini ta’minlash yuzasidan qilinishi rejalashtirilgan va amalga oshirilayotgan ishlar haqida ma’lumotlar berildi. Yakunda jamoatchilik uchun test topshiriqlari bilan tanishish, fikr-mulohazalar bildirish imkoniyatlari yaratilganligi qayd etib o‘tildi.

Tadbir qiziqarli va qizg‘in savol-javob tarzida o‘tkazilib, teleradiokanallar, bosma va elektron ommaviy axborot vositalari vakillari hamda blogerlarning savollariga javoblar berildi.

Davlat test markazi matbuot xizmati