Bugun, 2021-yil 24-dekabr kuni O‘zbekiston xalq shoiri Usmon Azim Davlat test markazi mehmoni bo‘ldi.

O‘tkazilgan ushbu ijodiy tadbirda Usmon Azimning sermashaqqat hayoti va ijodi, 1976-yilda O‘zbekiston radiosi Adabiy-dramatik eshittirishlar bosh muharririyatidan boshlangan, keyinchalik O‘zbekiston Yozuvchilar uyushmasida, O‘zbekiston Respublikasi Prezidenti devonida, “Savdogar” gazetasida davom etgan hamda hozir O‘zbek Milliy akademik drama teatrida adabiy bo‘lim mudiri sifatida sermazmun hayot va ijodiy faoliyat yo‘li to‘g‘risida jonli xotiralar bilan so‘zlab berildi.

Usmon Azim tug‘ilgan yurti Surxondaryo viloyatining qadimiy Boysunida milliy qadriyatlar havosi bilan toblangan inson. U nafaqat nazmda, balki nasrda ham o‘zining alohida o‘rniga ega. U millionlab ko‘ngillardan joy olgan shoir, yozuvchi, tarjimon, dramaturg, qo‘yingki, juda ajoyib inson, “Do‘stlik” ordeni sohibidir.

Ijodiy uchrashuv davomida Usmon Azim hayot va ijod yo‘li, ustozlar o‘gitlari, shoir yuragining hamisha uyg‘oqligi haqida so‘zladi. Shoir she’rlaridan namunalar o‘qib berish bilan birga, ularning yozilish tarixi bilan  ham o‘rtoqlashdi.

Shuningdek, ustoz shoir bilan birga uning shogirdi Shuhrat Orif ham tadbirda ishtirok etib, o‘z sherlaridan o‘qib berdi.

Uchrashuv jonli tarzda, qiziqarli savol-javoblarga boy o‘tdi. Xalqimiz e’zozidagi, xalq dardining kuychisi, yurt orzu-umidi bilan yashayotgan, bugungi adabiyotimizning otaxon ijodkorlaridan bo‘lgan shoirni ishtirokchilar o‘zlari uchun qaytadan kashf etganday bo‘ldilar.

Davlat test markazi matbuot xizmati