2019-yil 31-may kuni O‘zbekiston Respublikasi Prezidentining 2019-yil 14-maydagi “Oliy ta'lim muassasalariga test sinovlari orqali qabul qilish tizimini takomillashtirish bo‘yicha qo‘shimcha chora-tadbirlar to‘g‘risida”gi PQ-4319-son qarorida belgilangan vazifalar ijrosini ta'minlashga bag‘ishlangan videokonferensiya shaklida seminar tashkil etildi. 

Davlat xizmatlari agentligi va uning joylardagi markazlari xodimlari, Oliy ta'lim muassasalari mas'ul operatorlari va mas'ul kotiblari, Davlat test markazi va uning hududiy bo‘limlari xodimlari ishtirok etgan mazkur seminarda quyidagi masalalar ko‘rib chiqildi:

• 2019/2020 o‘quv yili qabulidan boshlab, O‘zbekiston Respublikasi ta'lim muassasalariga o‘qishga qabul qilish bo‘yicha Davlat komissiyasi tomonidan belgilanadigan davlat oliy ta'lim muassasalarining bakalavriatga o‘qishga kirish uchun abituriyentlar Davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali orqali murojaat qilishi bo‘yicha belgilangan vazifalarni sifatli amalga oshirish;
• abituriyentlarga hujjatlarini Ro‘yxatdan o‘tkazishlari uchun barcha sharoitlarni yaratish lozimligi, ularni qabul jarayonida navbat kutib qolmasliklari uchun yetarlicha xona, kompyuter va texnik kotiblar ajratish; 
• texnik kotiblar tomonidan ro‘yxatdan o‘tkazish jarayonida abituriyentlarning barcha savollariga javob berish, sarson-sargardonlikka yo‘l qo‘ymaslik choralarini ko‘rish. 

Seminar davomida mas'ullarga tegishli normativ-huquqiy hujjatlar ro‘yxati taqdim etildi. Shuningdek, Ro‘yxatdan o‘tkazish jarayonida ma'lumotlarni abituriyentning asl nusxadagi hujjatlaridan olish shartligi, kiritilgan xato, noto‘g‘ri yoki qalbaki ma'lumotlar uchun birinchi navbatda ma'lumotlarni Dasturga kiritgan texnik kotib javob berishi ta'kidlandi. Har bir texnik kotib (operator) ma'lumotlarni to‘g‘ri kiritishi haqida Kafolat xati berishi hamda faqat Kafolat xati bergan xodimga ma'lumotni kiritishga ruxsat berilishiga kelishildi.

Jarayonda korruptsiyaga sabab bo‘lishi mumkin bo‘lgan har qanday holartlarni oldini olish va barcha salbiy holatlar bo‘yicha hujjatlar huquq-tartibot organlariga yuborilishi normativ hujjatlarda belgilab qo‘yilganligi eslatib o‘tildi.

Seminar jarayonida abituriyentlarni ro‘yxatdan o‘tkazishning dasturiy ta'minoti seminar ishtirokchilariga taqdimot shaklida batafsil tushuntirib berildi.