Borgan sari turli o‘quv markazlari va saytlar tomonidan diagnostik test xizmati yo‘lga qo‘yilgani to‘g‘risida e’lonlar ko‘payib bormoqda.

Albatta, bunday xizmatlarning yo‘lga qo‘yilishi va diagnostik test sinovlari o‘tkazilishi abituriyentlar uchun foydali, agar ular yolg‘on ma’lumotlarsiz, to‘g‘ri ma’lumot bergan holda sifatli tashkil etilsa.

Afsuski, har doim ham unday emas. Ayrimlar o‘z manfaatini ustun qo‘ygan holda ko‘proq foyda olish maqsadida Davlat test markazi nomidan foydalanishni va yolg‘on ma’lumotlar bilan talabgorlar sonini oshirishni odat qilib olmoqda.

Mana shunday holatlardan biri Bunker School o‘quv markazi bilan kuzatilmoqda.

Ularning telegram boti va administratsiyasi tomonidan berilgan ma’lumotlarda go‘yoki test topshiriqlari Davlat test markazining 2022-yilgi yangi bazasidan olingani iddao qilinmoqda.

Bunker School telegram boti

Bunker School administratsiyasi

Lekin bu umuman haqiqatga to‘g‘ri kelmaydigan, yolg‘on ma’lumotlardir.

Davlat test markazi mutaxassislari tomonidan ularning abituriyentlarga taqdim etayotgan test topshiriqlari o‘rganib chiqilganda quyidagilar aniqlandi:

• Bunker School o‘quv markazi tomonidan talabgorlarga berilayotgan test topshiriqlari Davlat test markazining @e_dtm_bot telegram botidan olingan diagnostik test topshiriqlaridir;
• mazkur test topshiriqlarining birortasi 2022-yil uchun shakllantirilayotgan test topshiriqlariga taalluqli emas;
• Bunker School o‘quv markazi tomonidan to‘g‘ri javob sifatida taqdim etilayotgan test topshiriqlarining kalitlarida xatolar mavjud;
• buning natijasida test topshirgan talabgorlarning ishlari o‘quv markazi tomonidan xato tekshirilmoqda va talabgorlarga noto‘g‘ri tavsiyalar berilmoqda.

Davlat test markazi diagnostik test sinovlari bo‘yicha hech bir sayt yoki o‘quv markazi bilan hamkorlik qilmaydi.

Davlat test markazi axborot xizmati