2020-yil 11-mart kuni O‘zbekiston Respublikasi Prezidenti Sh.M.Mirziyoyevning o‘tgan yil dekabr oyida yangi tashkil etilgan al-Xorazmiy nomli maktabga tashrifi davomida yoshlar bilan bo‘lgan uchrashuvda tilga olingan va «Ilm, ma’rifat va raqamli iqtisodiyotni rivojlantirish yili»ga oid Davlat dasturida belgilangan masalalardan kelib chiqqan holda, Davlat test markazida faoliyat sohasida yoshlar ishtirokini tobora kengaytirish, mehnat samaradorligini oshirish, barcha jabhalarda yetarli shart-sharoitlar yaratish bo‘yicha amalga oshiriladigangan ishlarga bag‘ishlangan yoshlar bilan ochiq muloqot o‘tkazildi.

Ma’ruzachilar o‘z chiqishlarida keyingi yillarda hukumatimiz tomonidan aholining boshqa qatlamlari qatorida, ayniqsa yoshlarga berilayotgan e’tibor allaqachon davlat siyosatining muhim qismiga aylanib ulgurganligi, ularning ta’limgacha bo‘lgan hayoti, ta’lim olish huquqi, oila qurish, uy-joy yoki kasbi bo‘yicha ishlash va boshqa huquqlarini ta’minlash uchun yetarli shart-sharoitlar yaratilganligini e’tirof etdilar.

Davlat test markazi tomonidan joriy yilda davlat oliy ta’lim muassasalarining bakalavriat ta’lim yo‘nalishlarida o‘qishni istovchi yoshlarga qo‘shimcha qulaylik va imkoniyatlar yaratilayotganida yosh xodimlarning o‘rni katta ekanligi to‘g‘risida muhim fakt va dalillar asosida ma’lumotlar berildi.

Shuningdek, rahbariyat e’tibori natijasida muassasada yoshlar orasida ilmiy salohiyat oshayotganligi, sog‘lom turmush tarzi, kitobxonlik va sport bilan shug‘ullanish borasida faollik kuzatilayotganligi qayd etib o‘tildi.

Mazkur tadbirda ishtirok etgan Yoshlar ittifoqi markaziy kengashi raisi o‘rinbosari Kattaxanova Dilnoza Sobir qizi,  Yoshlar ittifoqi markaziy kengashi mas’ul xodimi va Davlat test markazi Matbuot xizmati rahbari tomonidan yoshlarning savollariga batafsil javob berib borildi. Kelgusi ochiq muloqotga qadar yoshlar hayotiga oid muammoli masalalar bo‘yicha takliflar ishlab chiqish, Yoshlar ittifoqi bilan birgalikda ko‘rib chiqishga kelishib olindi.

Davlat test markazi matbuot xizmati