Yoshlarning murojaatlarini o‘rganish, ularga qabul qilinayotgan qaror va farmonlarning mazmun-mohiyatini tushuntirish, sohada amalga oshirilayotgan islohotlar bilan tanishtirish maqsadida Davlat test markazi va uning hududiy bo‘limlari tomonidan yoshlar bilan uchrashuvlar tashkil etilmoqda.

Jumladan, 2021-yil 15-yanvar kuni Jizzax viloyati Forish tumanida Davlat test markazi boshqarma boshlig‘i B.Toshpo‘latov va Davlat test markazi Jizzax viloyati bo‘limi xodimlari tomonidan, 21-yanvar kuni Sirdaryo viloyati Shirin shahrida Davlat test markazi boshqarma boshlig‘i B.Toshpo‘latov, Shirin shahar hokimi S.Sultonov, Shirin shahar xalq ta’limi mudiri M.Toshtemirov va Davlat test markazi Sirdaryo viloyati bo‘limi xodimlari tomonidan uchrashuvlar o‘tkazildi.

Mazkur uchrashuvlarda 200 dan ziyod yoshlar, umumta’lim maktablar bitiruvchi sinf o‘quvchilari, fan o‘qituvchilari, ota-onalar hamda mahalla faollari ishtirok etdi.

Ularda O‘zbekiston Respublikasi Prezidentining Oliy Majlisga yo‘llagan Murojaatnomasi va hukumat qarorlarining mazmun-mohiyati tushuntirilib, oliy ta’lim muassasalariga o‘qishga kirishda yoshlar uchun yaratilayotgan keng imkoniyatlar va qulayliklar to‘g‘risida ma’lumotlar berildi.

Shuningdek, joriy yil qabulida o‘tkaziladigan kirish test sinovlarida rejalashtirilayotgan yangiliklar va o‘zgarishlarga alohida e’tibor qaratildi.

Uchrashuvlar davomida ishtirokchilarning fikr-mulohazalari va takliflari o‘rganilib, ularga batafsil javob berildi.

Davlat test markazi rahbariyati va hududiy bo‘limlari tomonidan yoshlar bilan uchrashuvlar doimiy tarzda davom ettiriladi.

Davlat test markazi matbuot xizmati