2020-jıl 13-yanvar kúni Ózbekstan jaslar awqamı Oraylıq keńesi binasında Jaslar press-klubınıń náwbettegi sessiyası sheńberinde bilimlendiriw tarawında 2019-jılfda ámelge asırılǵan jumıslar hám 2020-jıldaǵı tiykarǵı wazıypalar talqılandı.

Ilajda Joqarı hám orta arnawlı bilimlendiriw ministrligi, Xalıq bilimlendiriw ministrligi, Mektepke shekemgi bilimlendiriw ministrligi, Bilimlendiriw sapasın qadaǵalaw mámleketlik inspekciyası, Mámleketlik test orayı hám de Prezident, dóretiwshilik hám qánigelestirilgen mekteplerdi rawajlandırıw agentligi basshıları qatnastı.

Ilaj dawamında Mámleketlik test orayı direktorı Madjit Malikovich Karimov Mámleketlik test orayı tárepinen 2019-jılda ámelge asırılǵan jumıslar, tabıslar, kemshilikler hám endi ámelge asırılıwı kózde tutılıp atırǵan test sınawların jetilistiriw boyınsha jobalar haqqında maǵlıwmat berdi.

Test sınawların jetilistiriw boyınsha jobalar:

• Test tapsırmalarınıń mazmunı hám strukturasın jetilistiriw hám de olarǵa sáykes juwapların hár túrli (standartlastırılǵan, pikirlewge baǵdarlanǵan) halda dúziwdi basqıshpa-basqısh engiziw.
• Aymaqlarda jeńil konstrukciyalı materiallardan úlken sıyımlıqtaǵı binalar, orınlar qurılısı hám jıl dawamında test sınawların ótkeriw. Binalardı zamanagóy videogúzetiw kameraları hám de audiojazıw qurılmaları menen úskenelew.
• Abiturientlerge Mámleketlik test orayınıń rásmiy saytı arqalı dizimnen ótiw imkaniyatın jaratıw.
• Abiturientlerge jıl dawamında test sınawın tapsırıw imkaniyatın jaratıw.
• Abiturientlerge 5 yaki 6 joqarı bilimlendiriw mekemesin (bilimlendiriw baǵdarın) tańlaw imkanın beriw.
• Shet tillerdegi sıyaqlı ulıwma bilimlendiriw pánlerinen sertifikat beriwdi basqıshpa-basqısh engiziw.
• XBM menen birge joqarı bilimlendiriw mekemelerine kiriw tileginde bolǵan pitkeriwshilerdi test sınawınan ótkeriw hám oqıwshilardıń pitkeriw imtixan balları tiykarında tańlawda qatnasıwdı támiyinlew.

Ilaj juwmaǵında jurnalist hám blogerlerdiń temaǵa baylanıslı sorawlarına tolıq juwap berildi.

Mámleketlik test orayı xabar xızmeti