XALQARO HAMKORLAR BILAN UCHRASHUV O‘TKAZILDI
Bilimni baholash agentligi va AQShning “Educational Testing Service” tashkiloti o‘rtasida hamkorlik aloqalari yo‘lga qo‘yilgan bo‘lib, ikki tomonlama Memorandum imzolangan.
Shuningdek, TOEFL testlari respublikamizda abituriyentlar, ilmiy izlanuvchilar hamda o‘qituvchilarga bir qancha imtiyozlar taqdim etadi.
Xususan, Vazirlar Mahkamasining 2019-yil 13-maydagi 395-son qaroriga muvofiq TOEFL IBT imtihonida B2 va undan yuqori darajaga ega talabgorlarga ingliz tilidan maksimal ball berilishi belgilangan.
Joriy yilning 15-21-aprel kunlari “Educational Testing Service” tashkilotining delegatsiyasi Toshkentda amaliy tashrif bilan bo‘lishadi.
Tashrifning asosiy maqsadi 18-aprelda ingliz tili o‘qituvchilari uchun TOEFL testlari bo‘yicha konferensiya va qisqa seminarlar tashkil etishdan iborat.
17-aprel kuni Bilimni baholash agentligi vakillari bilan ham uchrashuv tashkil etildi.
Uchrashuvda Agentlik faoliyati bo‘yicha taqdimot qilindi.
Shuningdek, hamkorlikda TOEFL IBT sertifikatlarining haqiqiyligini tekshirish va qoida buzish holatlarining oldini olish kabi masalalar muhokama qilindi.
Agentlik va hududiy bo‘limlarda TOEFL IBT va GRE imtihonlarini tashkil etish jarayonini jadallashtirish yuzasidan kelishuvga erishildi. Uchrashuv yakunida mehmonlar Agentlikda talabgorlar uchun yaratilgan shart-sharoitlar, xavfsizlikni ta’minlash bo‘yicha amalga oshirilgan ishlar bilan tanishtirildi.
TURK TILIDAN MILLIY SERTIFIKAT ISTANBUL OKAN UNIVERSITETI TOMONIDAN TAN OLINADI
2024-yil 27-fevral kuni Bilimni baholash agentligida Turkiyaning Istanbul Okan universiteti (İstanbul Okan Üniversitesi) vakillari bilan uchrashuv bo‘lib o‘tdi.
Uchrashuv mobaynida baholash sohasida hamkorlikni yo‘lga qo‘yish, seminar-treninglar tashkil etish va boshqa masalalar bo‘yicha loyihalarni amalga oshirish masalalari muhokama qilindi.
Uchrashuv natijasida Bilimni baholash agentligi tomonidan o‘tkaziladigan chet tilini bilish darajasini aniqlash imtihoni asosida beriladigan turk tilidan milliy sertifikat Istanbul Okan universiteti tomonidan tan olinishiga kelishildi.
Bilimni baholash agentligi tomonidan beriladigan ingliz tilidan milliy sertifikat 2023-yildan Istanbul Okan universiteti tomonidan rasman tan olingan.
TURKMANISTON TA’LIM VAZIRLIGI BILAN HAMKORLIK YO‘LGA QO‘YILMOQDA
2023-yil 24-mart kuni Bilimni baholash agentligida agentlik faoliyati bilan yaqindan tanishish va Turkmaniston ta’lim vazirligi bilan hamkorlik aloqalarini yo‘lga qo‘yish bo‘yicha uchrashuv bo‘lib o‘tdi.
Uchrashuvda Turkmaniston ta’lim vazirining oliy va o‘rta maxsus o‘quv yurtlari masalalari bo‘yicha o‘rinbosari Atayev Azat Muxammedovich va Bilimni baholash agentligi direktori Karimov Madjit Malikovich hamda agentlik xodimlari ishtirok etdi.
Dastlab, mehmonlarga Bilimni baholash agentligi tomonidan test sinovlarini tashkil etish, o‘tkazish, shaffoflikni ta’minlash va natijalarni e’lon qilish kabi masalalar yuzasidan taqdimot qilindi.
Uchrashuv davomida A.Atayevni qiziqtirgan savollarga batafsil javob berildi va agentlik tomonidan test sinovlarini tashkil etish va o‘tkazish mexanizmi tushuntirib berildi.
Uchrashuv yakunida A.Atayev tomonidan joriy yilning iyun oyida agentlikka Turkmaniston ta’lim vazirligi delegratsiyasi tashrif buyurishi taklifi bildirildi va doimiy hamkorlikni yo‘lga qo‘yishga kelishib olindi.
ETS GLOBAL TASHKILOTI VAKILLARI BILAN UCHRASHUV O‘TKAZILDI
2023-yil 23-yanvar kuni “Educational Testing Service – ETS Global” tashkiloti bilan o‘zaro hamkorlikni yanada kengaytirish bo‘yicha uchrashuv bo‘lib o‘tdi.
Unda ETS Global tashkilotining hududiy rahbari Anna Gutkowska-Zając va ETS Global tashkiloti vakillari ishtirok etdi.
Uchrashuvda ETS Global tashkilotining hududiy rahbari Anna Gutkowska-Zając tomonidan TOEFL testlarini test topshiruvchilar orasida yanada ommalashtirish bo‘yicha muntazam ravishda tegishli ishlar amalga oshirilayotgani ta’kidlandi.
Uchrashuv yakunida TOEFL ITP va TOEIC testlari bo‘yicha o‘qituvchilar uchun yuzma-yuz va onlayn shaklda seminar-treninglar tashkil etish hamda talabgorlar ushbu testlar strukturasini o‘zlashtirishlari uchun bepul repetitsion test sinovlarini tashkil etishga kelishib olindi.
SANKT-PETERBURG DAVLAT UNIVERSITETI BILAN HAMKORLIK YO‘LGA QO‘YILDI
2022-yil 21-aprel kuni Davlat test markazida Sankt-Peterburg davlat universiteti bilan hamkorlik aloqalarini yo‘lga qo‘yish bo‘yicha uchrashuv bo‘lib o‘tdi.
Yig‘ilishda baholash sohasida hamkorlik aloqalarini yo‘lga qo‘yish, ushbu sohada o‘zaro tajriba almashish kabi masalalar muhokama qilindi.
Shuningdek, “Rus tili chet tili sifatida” (TRKI) testlarini Davlat test markazida joriy etish bo‘yicha hamkorlik qilishga kelishib olindi.
Uchrashuvda Davlat test markazidan direktor o‘rinbosari Sardor Radjabov va soha mutaxassislari hamda Sankt Peterburg davlat universitetining yoshlar siyosati va qabul bo‘yicha birinchi prorektori Aleksandr Vyacheslavovich Babich, Tillarni baholash markazi direktori Dmitriy Viktorovich Ptyushkin ishtirok etdilar.
DAVLAT TEST MARKAZI VA BRITANIYA KENGASHI O‘RTASIDA UCHRASHUV
2022-yil 21-fevral kuni Davlat test markazi va Britaniya Kengashi (British Council) o‘rtasida hamkorlikni yanada rivojlantirish bo‘yicha uchrashuv bo‘lib o‘tdi.
Uchrashuvda Davlat test markazi direktori M.Karimov, direktor o‘rinbosarlari S.Radjabov hamda Sh.Batirov, Chet tilini bilish va egallash darajasini baholash boshqarmasi boshlig‘i J.Nurmatov, Davlat test markazi huzuridagi Ilmiy-o‘quv amaliy markazi boshlig‘i A.Baratov, Xalqaro reytinglar bo‘yicha faoliyatni amalga oshirish bo‘limi bosh mutaxassisi N.Lutfiyev, O‘zbekistondagi Britaniya Kengashi direktori Denis Veddingem hamda Britaniya Kengashi vakillari Viktoriya Klark, Joanna Mooteram, J.Gulyamova, A.Maksakov, A.Sadikov ishtirok etdi.
Uchrashuvda “O‘qituvchilar uchun Aptis” test sinovini yanada ommalashtirish, test topshiruvchilarga ushbu test yuzasidan to‘liq ma’lumot berish, Britaniya Kengashi vakillari bilan ovozli chatlar tashkil etish orqali savollarga javob olish kabi fikrlar ilgari surildi.
Shuningdek, uchrashuv mobaynida hamkorlik doirasini yanada kengaytirish va belgilangan hamkorlik sohalarini amalga oshirish maqsadida tegishli ishlarni amalga oshirishga kelishib olindi.
DAVLAT TEST MARKAZI VA BRITANIYA KENGASHI O‘RTASIDA UCHRASHUV
Davlat test markazi va Britaniya Kengashi (British Council) o‘rtasida “O‘qituvchilar uchun Aptis” test sinovini yanada rivojlantirish bo‘yicha uchrashuv bo‘lib o‘tdi.
Uchrashuvda Chet tilini bilish va egallash darajasini baholash boshqarmasi boshlig‘i Javlonbek Nurmatov, Davlat test markazi huzuridagi Ilmiy-o‘quv amaliy markazi boshlig‘i Akmal Baratov, Chet tilini bilish darajasining pedagogik o‘lchovlarini rivojlantirish bo‘limi boshlig‘i Elvira Urayeva, Xalqaro reytinglar bo‘yicha faoliyatni amalga oshirish bo‘limi bosh mutaxassisi Nasimbek Lutfiyev hamda Britaniya Kengashi vakillari Janar Rahimjаnova, Andrey Maksakov va Amirsaid Sadikov ishtirok etdi.
Yig‘ilishda “O‘qituvchilar uchun Aptis” test sinovi ingliz tili o‘qituvchilari o‘rtasida ommalashib borayotgani va ushbu test sinovi barcha hududlarda (Qoraqalpog‘iston Respublikasi, viloyatlar va Toshkent shahri) tashkil etilayotgani, bu esa talabgorlar uchun qulay bo‘layotgani alohida ta’kidlab o‘tildi.
Shuningdek, mazkur test sinoviga tayyorlanish uchun qo‘shimcha materiallarni yanada ko‘paytirish, ingliz tili o‘qituvchilari uchun ushbu test yuzasidan onlayn seminarlar tashkil etish yuzasidan fikr almashildi.
FILOLOGIYA VA MADANIYATLARARO ALOQALAR INSTITUTI DIREKTORI BILAN UCHRASHUV
2021-yil 14-dekabr kuni Davlat test markazi va Rossiyaning Qozon federal universiteti huzuridagi Filologiya va madaniyatlararo aloqalar instituti o‘rtasida hamkorlik aloqalarini yo‘lga qo‘yish bo‘yicha uchrashuv bo‘lib o‘tdi.
Uchrashuvda Davlat test markazi direktori Madjit Karimov, Test sinovlarini tashkil etish va muvofiqlashtirish bosh boshqarmasi boshlig‘i Farxod Mirzayev, Chet tilini bilish va egallash darajasini baholash boshqarmasi boshlig‘i Javlonbek Nurmatov, Test sinovlari texnologiyalarini rivojlantirish boshqarmasi boshlig‘i Zafarbek Olimbekov, Umumta’lim fanlari bo‘yicha test topshiriqlarini shakllantirish bo‘limi boshlig‘i Akmal Sulaymonov, Xalqaro reytinglar bo‘yicha faoliyatni amalga oshirish bo‘limi bosh mutaxassisi Nasimbek Lutfiyev, Rossiyaning Qozon federal universiteti huzuridagi Filologiya va madaniyatlararo aloqalar instituti direktori Radif Zamaletdinov hamda Mirzo Ulug‘bek nomidagi O‘zbekiston Milliy universiteti O‘zbek-Qozon qo‘shma ta’lim dasturi fakulteti dekani Farxod Babashov ishtirok etdi.
Yig‘ilishda rus tilidan test topshiriqlarini shakllantirish, mazkur jarayonni yanada rivojlantirish, buning uchun ishchi guruh tashkil qilish, hamkorlikda test topshiriqlari spetsifikatsiyasi va boshqa muhim jihatlar ustida amaliy ishlar olib borish xususida fikrlar almashildi.
Filologiya va madaniyatlararo aloqalar instituti direktori Radif Zamaletdinov Davlat test markazi bilan hamkorlik aloqalari har ikki tomon uchun foydali ekanligi va Davlat test markazi bilan hamkorlik qilishdan mamnunligini bildirdi.
Uchrashuv yakunida ikki tashkilot o‘rtasidagi hamkorlik aloqalarini yanada mustahkamlash maqsadida Memorandum imzolash bo‘yicha kelishib olindi.
CAMBRIDGE ASSESSMENT TASHKILOTI BILAN HAMKORLIK MUSTAHKAMLANMOQDA
2021-yil 26-noyabr kuni Davlat test markazida Cambridge Assessment tashkiloti bilan o‘zaro hamkorlikni yana kuchaytirish bo‘yicha navbatdagi uchrashuv bo‘lib o‘tdi.
Uchrashuvda Davlat test markazi direktori o‘rinbosarlari Sardor Radjabov va Sherzod Batirov, Chet tilini bilish va egallash darajasini baholash boshqarmasi boshlig‘i Javlonbek Nurmatov, Test sinovlari texnologiyalarini rivojlantirish boshqarmasi boshlig‘i Zafarbek Olimbekov, Davlat test markazi huzuridagi Ilmiy-o‘quv amaliy markazi boshlig‘i Akmal Baratov, Xalqaro reytinglar bo‘yicha faoliyatni amalga oshirish bo‘limi bosh mutaxassisi Nasimbek Lutfiyev hamda Cambridge Assessment tashkiloti vakili Stephen King ishtirok etdi.
Yig‘ilishda Davlat test markazi tomonidan baholash mezonlari, test topshiriqlari spetsifikatsiyasi, tashkiliy va xavfsizlik kabi yo‘nalishlar yangi bosqichga o‘tayotgani, bu borada Cambridge Assessment tashkiloti tajribasidan foydalanish xususida to‘xtalib o‘tildi.
Davlat test markazi direktori o‘rinbosari Sardor Radjabov test topshiriqlari sifatini yanada yaxshilash maqsadida fan ekspertlarining malakasini oshirish, bilim va ko‘nikmalar almashish hamda boshqa hamkorlik yo‘nalishlari xususida to‘xtalib o‘tdi.
Shuningdek, ikki tashkilot o‘rtasidagi hamkorlik aloqalarini yanada mustahkamlash maqsadida Memorandum imzolash bo‘yicha kelishib olindi.
CAMBRIDGE ASSESSMENT TASHKILOTI BILAN UCHRASHUV O‘TKAZILDI
2021-yil 23-iyun kuni Bilimni baholash agentligi Cambridge Assessment tashkiloti bilan o‘zaro hamkorlikni yana kuchaytirish bo‘yicha uchrashuv bo‘lib o‘tdi.
Uchrashuvda Bilimni baholash agentligi direktori Madjit Karimov, direktor o‘rinbosari Sardor Radjabov, Chet tilini bilish va egallash darajasini baholash boshqarmasi boshlig‘i Javlon Nurmatov, boshqarma bosh mutaxassisi Nasimbek Lutfiyev hamda Cambridge Assessment tashkiloti vakillari Stephen King va Natalia Tsarikova ishtirok etdi.
Yig‘ilishda Stephen King Bilimni baholash agentligi va Cambridge Assessment tashkiloti o‘rtasidagi hamkorlik tarixiga to‘xtalib, shu kungacha hamkorlikda qilingan ishlar ko‘lami beqiyos ekani, xususan, ingliz tili va matematika fani bo‘yicha ekspertlar uchun o‘tkazilgan seminar trening hamda 2019- va 2021-yillardagi Prezident maktablariga saralash imtihonlaridagi hamorlikka alohida urg‘u berdi.
Shuningdek, Bilimni baholash agentligi tomonidan baholash sohasiga jiddiy e’tibor qaratilayotganligi juda ham muhim ekanligini aytib, Cambridge Assessment tashkiloti tomonidan shu yilning o‘zida har bir fan yuzasidan sifat nazoratini yangi bosqichga olib chiqish reja qilingani va bu hamkorlikni yanada mustahkamlanishiga xizmat qilishini ta‘kidladi.
Bilimni baholash agentligi direktori Madjit Malikovich test topshiriqlari sifatini yanada oshirish maqsadida fan ekspertlarining malakasini oshirish, bilim va ko‘nikmalar almashish hamda boshqa hamkorlik yo‘nalishlari xususida to‘xtalib, kelgusi yillarda Bilimni baholash agentligi mutaxassislarini Cambridge Assessment tashkilotida malaka oshirishlari uchun yuborish rejalashtirilayotganini aytib o‘tdi.
Shundan so‘ng, Bilimni baholash agentligi direktor o‘rinbosari Sardor Radjabov bir necha yillardan beri Cambridge Assessment tashkiloti bilan mustahkam aloqalar yo‘lga qo‘yilganligini ta’kidlab, kelajakda baholash sohasida amalga oshirilishi rejalashtirilayotgan vazifalar borasida fikr bildirdi.
DAVLAT TEST MARKAZI ALTE TASHKILOTINING RASMIY HAMKORIGA AYLANDI
Bugungi kunda Bilimni baholash agentligi ko‘pgina xalqaro tashkilotlar bilan hamkorlik o‘rnatgan bo‘lib, faoliyat sifatini oshirishga, testologiya sohasini rivojlantirishga, baholash tizimini yanada adolatli va shaffof bo‘lishiga erishmoqda. Buni Germaniyaning Toshkent shahridagi Gyote instituti (Geothe institut), Rossiyaning Pedagogik o‘lchovlar federal instituti (FIPI), AQShning Educational Testing Service (ETS) tashkiloti va “SCANTRON” korporatsiyasi , Koreyaning Koreya ta’limi va dasturlarini baholash instituti, Yaponiyaning Universitetlarga kirish imtihonlarini o‘tkazish milliy markazi, Turkiyaning Baholash, tanlash va joylashtirish markazi (OSYM), Buyuk Britaniyaning Norvich tilni o‘rganish intstituti (NILE), Britaniya Kengashi (British Council), Cambridge Assessment English va boshqa shu kabi xalqaro tashkilotlar bilan yaqindan hamkorlik o‘rnatganida ko‘rish mumkin.
Bilimni baholash agentligi xalqaro faoliyat doirasini kengaytirish maqsadida yana bir yirik xalqaro tashkilot – ALTE bilan hamkorlikni yo‘lga qo‘ydi.
ALTE Yevropa va boshqa mamlakatlarda lingvistik qobiliyatni adolatli va aniq baholashga ko‘maklashish uchun hamkorlikda faoliyat olib boradigan test olishga mas’ullarning birlashmasi bo‘lib, 1989-yilda Kembridj universiteti (Buyuk Britaniya) va Universidad de Salamanca (Ispaniya) tomonidan tashkil etilgan. U Yevropa tillari bo‘yicha imtihonlarning sifatli auditorlik tizimini boshqaradi.
Bugungi kunda ALTE tashkiloti tarkibida 25 ta Yevropa tillarini baholovchi 33 ta to‘liq a’zo tashkilot, shuningdek, 68 ta hamkor tashkilot, 15 nafar yuqori malakali ekspertlar va dunyo bo‘ylab 800 dan ortiq mutaxassislar mavjud.
Bilimni baholash agentligi ALTE tashkilotining rasmiy hamkoriga aylandi va kelajakda ALTE tashkiloti bilan hamkorlikda bir nechta istiqbolli vazifalarni amalga oshirishni rejalashtirgan. Shuni eslatish joizki, rivojlangan mamlakatlar e’tiboridagi bu tashkiloti bilan hamkorlik Bilimni baholash agentligi uchun baholash tizimini yanada takomillashtirishga xizmat qiladi.
Bilimni baholash agentligi ALTE tashkilotining hamkoriga aylanishi to‘liq rasmiy a’zoligini qo‘lga kiritishning birinchi bosqichi hisoblanadi. ALTEning xalqaro sifat belgisini (Q-Mark) qo‘lga kiritish va to‘liq rasmiy a’zosiga aylanish juda murakkab jarayon bo‘lib, keyingi bosqichga o‘tish uchun kamida 1 yil davomida uning rasmiy hamkori sifatida faoliyat olib borish lozim. Shuningdek, xalqaro o‘rganish va tekshiruvlardan o‘tish kabi bir qator talablarni bajarish kerak. Shundan so‘ng, Bilimni baholash agentligi tomonidan beriladigan chet tili bo‘yicha milliy sertifikat xorijiy davlatlarning ta’lim tashkilotlari tomonidan tan olinishiga erishiladi.
