Abituriyentlarni oliy ta’lim muassasalarining bakalavriat ta’lim yo‘nalishlariga qabul qilish Vazirlar Mahkamasining 2017-yil 20-iyundagi 393-son qarori bilan tasdiqlangan “Oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risida” nizom asosida amalga oshiriladi.

Mazkur nizomga muvofiq talabalikka tavsiya etilgan abituriyentlar oliy ta’lim muassasasining qabul komissiyasiga umumiy o‘rta ta’lim (11-sinf negizida) yoki o‘rta maxsus, kasb-hunar ta’limi muassasasini tugatganligi haqidagi hujjat (ilovasi bilan) ni taqdim etishlari lozim.

Shuningdek, my.dtm.uz yoki my.gov.uz saytlaridan biri orqali onlayn ro‘yxatdan o‘tishda tugatgan ta’lim muassasasi to‘g‘risidagi ma’lumotlar kiritilishi lozim.

Maktabning 10-sinfida yoki akademik litseylarning 1-bosqichida tahsil olayotgan o‘quvchilar umumiy o‘rta ta’lim yoki o‘rta maxsus, kasb-hunar ta’limi muassasasini tugatmagan hisoblanadi.

Shu sababli ular oliy ta’lim muassasalariga kirish test sinovlarida ishtirok etish uchun onlayn ro‘yxatdan o‘tishlari mumkin emas.

Davlat test markazi axborot xizmati