6-avgust kuni Prezident Shavkat Mirziyoyev joriy yilda oliy ta’lim muassasalariga qabulni tashkil qilish va 2020-2021-o‘quv yiliga tayyorgarlik ko‘rish masalalari yuzasidan yig‘ilish o‘tkazdi.

Yig‘ilishda Prezident ta’kidlaganidek, so‘nggi yillarda oliy ta’lim tizimidagi o‘zgarishlar natijasida yoshlar va ularning ota-onalarida o‘qishga ishonch ortdi. Hujjat topshirish to‘liq masofaviy shaklda amalga oshirilgani aholiga katta qulaylik yaratdi.

Joriy yilda mamlakatimizdagi oliy ta’lim muassasalarining bakalavriat bosqichiga 162 364 ta, magistraturaga 10 425 ta o‘rin ajratilgan. Ko‘rsatkichlar o‘tgan yildagiga qaraganda o‘rinlar soni keskin oshganligini ko‘rsatmoqda.

Bu yil 91 ta davlat oliy ta’lim muassasalarining bakalavriat ta’lim yo‘nalishi bo‘yicha 1 million 484 ming nafar abituriyent hujjat topshirgan bo‘lib, bu o‘tgan yilgiga nisbatan 39 foiz ko‘p. Bitta o‘ringa 10,6 ta talabgor to‘g‘ri kelmoqda.

Magistratura yo‘nalishida 72 ta ta’lim dargohiga 78 ming 720 nafar yoki o‘tgan yilgiga nisbatan 3 barobar ko‘p hujjat topshirilgan. Umuman, qabul kvotalari 2016-yilgiga nisbatan 3 marta ortgan.

Haqiqatan ham, bugungi kunda qabul test sinovlari qachon, qayerda va qanday tartibda o‘tkazilishi jamoatchilikni ham o‘yga toldirgan. Bu, albatta, hozirgi sharoitda karantin cheklovlarining cho‘zilayotganligi bilan bog‘liq bo‘lib, bunday sharoitda, aniq ma’lumotlar yo‘qligi, turli internet nashrlarida har xil ma’lumotlar berilayotganligi ham abituriyentlar, ota-onalariga ta’sir qilmoqda.

Shularni hisobga olgan holda, 6-avgust kuni o‘tkazilgan yig‘ilish chog‘ida Prezident tomonidan test sinovlarini abituriyentlar va nazoratchilar uchun epidemiologik xavfsizlikni ta’minlash imkonini beradigan joyda o‘tkazish kerakligi aytildi.

Hozirgi murakkab paytda ob’ektlarning test topshiruvchilar uchun xavfsizligi masalalarini o‘rganish chog‘ida yopiq binolar epidemiologik talabga javob bermasligi, shuningdek, ijtimoiy masofaga rioya qilingan taqdirda imtihonlar vaqti anchaga cho‘zilib ketishi hisobga olindi.

Shularni inobatga olib, test sinovlarini Toshkent va Nukus shaharlari, viloyatlar markazlaridagi stadionlarda tashkil etishga topshiriq berildi. Bunda imtihonlar kuniga 2 marta (havo salqin paytda) o‘tkazilsa, barchasini taxminan 12-14 kunda yakunlash mumkin.

Ushbu topshiriqlar doirasida mutasaddi vazirlik va idoralarga stadionlarni test sinovlariga puxta tayyorlash, ularning dislokatsiyasi bo‘yicha abituriyentlarni to‘liq xabardor qilish yuzasidan ko‘rsatmalar berildi.

Shu bilan birga, yig‘ilishda test sinovlari o‘tkazish sanasini Sog‘liqni saqlash vazirligi va Sanitariya-epidemiologiya xizmatining epidemiologik vaziyat borasidagi xulosasidan kelib chiqqan holda belgilash, aholi salomatligiga xavfsizligini ta’minlash lozimligi ta’kidlandi.

Test sinovlarini shaffof holda o‘tkazish uchun, yoshlarni ortiqcha sarson qilmaslik maqsadida Ta’lim muassasalariga o‘qishga qabul qilish bo‘yicha Davlat komissiyasi, hokimliklar, Ichki ishlar vazirligi, Milliy gvardiya, Jismoniy tarbiya va sport vazirligi, Davlat xavfsizligi xizmati tomonidan zarur choralar ko‘riladi.

Eslatish joizki, test sinovlari o‘tkazish sanalari ma’lum bo‘lgandan keyin abituriyentlarga onlayn ro‘yxatdan o‘tishda foydalangan telefon raqamiga sms shaklida ma’lumot yuboriladi.

Davlat test markazi matbuot xizmati