Ma’lumki, 2022-yil 30-mayda O‘zbekiston Respublikasi Prezidentining “O‘zbekiston Respublikasining seysmik xavfsizligini ta’minlash tizimini yanada takomillashtirish chora-tadbirlari to‘g‘risida”gi PF–144-son Farmoni qabul qilingan.

Mazkur Farmonda tashkilotlarda tegishli soha mutaxassislarini jalb etgan holda zilzila va uning oqibatlariga oid ko‘rgazmali o‘quv-uslubiy vositalar yordamida amaliy o‘quv mashg‘ulotlarini tashkil etish bo‘yicha vazirlik va idoralar hamda mahalliy ijro etuvchi hokimiyat organlariga vazifa yuklatilgan.

PF–144-son Farmonida belgilangan vazifalar ijrosini ta’minlash maqsadida hamda 2023-yil 15-noyabrdan 15-dekabrga qadar yurtimizda “yong‘in xavfsizligi oyligi” o‘tkazilayotgani munosabati bilan 2023-yil 7-dekabr kuni Bilimni baholash agentligi xodimlari uchun zilzila va uning oqibatlari hamda yong‘in sodir bo‘lganda uni bartaraf etish choralarini ko‘rish bo‘yicha tadbir o‘tkazildi.

Tadbirda Agentlik xodimlariga favqulodda vaziyatlarning oldini olish, xususan, zilzila yoki yong‘in sodir bo‘lganda to‘g‘ri harakat qilish bo‘yicha zarur bilim va ko‘nikmalar berildi.