2019-yil 19-21-noyabr kunlari bo’lib o’tgan Chet tilini bilish va egallash darajasini aniqlash test sinovlaridan muvaffaqiyatli o’tgan talabgorlar o’z sertifikatlarini 4-dekabrdan boshlab olishlari mumkin.

Bunda talabgorlar ro’yxatdan o’tish vaqtida sertifikatni olish hududi sifatida qaysi hududni ko’rsatgan bo’lsa, shu hududda joylashgan Davlat test markazi yoki uning hududiy bo’limlaridan o’z sertifikatlarini olishi kerak bo’ladi.

Sertifikatni olish hududi sifatida Toshkent shahri yoki Toshkent viloyatini tanlagan talabgorlar 4-dekabrdan boshlab Davlat test markazi binosidan, Qoraqalpog’iston Respublikasi yoki viloyatlardan birini tanlagan talabgorlar 6-dekabrdan boshlab hududlardagi Davlat test markazi bo’limlaridan shaxsni tasdiqlovchi hujjat bilan sertifikatlarini olib ketishlari mumkin.

Sertifikat pasport ko‘rsatilgan taqdirda, shaxsan talabgorga yoki talabgorning notarial tasdiqlangan ishonchnomasi asosida boshqa shaxsga beriladi.

Eslatma: Sertifikatlar ish kunlarida (dushanba, seshanba, chorshanba, payshanba, juma kunlari) tarqatiladi. Shanba va yakshanba kunlari Davlat test markazi va uning hududiy bo’limlari uchun dam olish kuni hisoblanadi.

Davlat test markazi matbuot xizmati