Test sinovlarida ishtirok etish uchun ro‘yxatdan o‘tishning oxirgi muddat yaqinlashgan sari abituriyentlarning ro‘yxatdan o‘tish joylariga murojaati oshib bormoqda. Masalan, birinchi haftada respublikamizdagi oliy ta'lim muassasalari va filiallarining kunduzgi, sirtqi va kechki ta'lim shakllarida ta'lim olishni istovchi jami 3660 (bir kunda o‘rtacha 522) nafar abituriyentlar ro‘yxatdan o‘tgan bo‘lsa, bu ko‘rsatkich bugungi kunda 84755 (bir kunda o‘rtacha 4985) nafarni tashkil etmoqda. Bu yerda kunduzgi ta'limga 81129, kechkiga 273, sirtqiga esa 3353 nafar tabituriyent ro‘yxatdan o‘tganligini qayd etish kerak.

2 iyul holati tahliliga qaraganda kunduzgi ta'lim shaklida tahsil olish uchun Samarqand davlat universitetiga 4513, Urganch davlat universitetiga 4326, Andijon davlat universitetiga 4238 nafar abituriyent ro‘yxatdan o‘tgan bo‘lsa, filiallar orsida “ilg‘or” Termiz davlat universitetining Denov filialidir – 633 nafar. Kechki ta'lim bo‘yicha O‘zbekiston davlat jahon tillari universitetini 64 nafar abituriyent tanlagan, bu hozircha eng ko‘pi bo‘lib turibdi. Sirtqida – Samarqand davlat universiteti (200 nafar), Toshkent viloyati Chirchiq davlat pedagogika instituti (189) va Guliston davlat universiteti (185) esa ko‘proq tanlangan.

Aksincha, Navoiy konchilik instituti Nukus filialiga 13, Milliy raqs va xoreografiya oliy maktabiga 24 va Samarqand veterinariya meditsinasi instituti Nukus filialiga 29 nafar abituriyent murojaat qilgan. 

Bular ro‘yxatdan o‘tishning 16 kunlik ma'lumotlari, xolos. Ro‘yxatdan o‘tish uchun murojaatlar soni kundan-kunga oshib bormoqda.

Respublikadagi oliy ta'lim muassasalari bo‘yicha ko‘rsatkichlar bilan havolani bosish orqali tanishish mumkin.

Davlat test markazi barcha abituriyentlarga omad va muvaffaqiyat tilaydi.

Davlat test markazi