Ma’lumki, davlat xizmatchilarining ma’naviy hordiq chiqarishlari uchun teatrlarga borishi va spektakllar tomosha qilishini tashkil etish Prezident va Hukumatning qator qarorlarida belgilangan.

Jumladan, O‘zbekiston Respublikasi Prezidentining “Respublikada milliy askiya va qiziqchilik san’atini yanada rivojlantirish chora-tadbirlari to‘g‘risida” 2023-yil 11-iyuldagi PQ-222-son qarorida ham davlat organlari, muassasalari va korxonalari har chorakda kamida bir marotaba budjetdan tashqari mablag‘lari hamda kasaba uyushmalari mablag‘lari hisobidan o‘z xodimlarining madaniy-estetik hordiq chiqarishlari uchun ommaviy-madaniy va konsert-tomosha tadbirlarini tashkil etish, shuningdek, konsert, sirk va teatrlarga, askiya, qiziqchilik va so‘z san’ati tomoshalariga kirish uchun chipta va abonementlarni xarid qilish amaliyotini yo‘lga qo‘yishi ko‘rsatib o‘tib o‘tilgan.

Shunga ko‘ra Bilimni baholash agentligi tomonidan ham xodimlarning ishdan keyingi vaqtlarini maroqli o‘tkazishlari uchun sharoitlar yaratish maqsadida 2023-yil 14-sentabr kuni O‘zbek milliy akademik drama teatrida namoyish etilgan “Usmon Nosir” spektakliga agentlikning bir guruh xodimlari tomonidan tashrif uyushtirildi.

O‘zining betakror isteʼdodi, yuksak matonati va xalqparvarligi bilan oʻzbek adabiyotida oʻchmas iz qoldirgan otashin shoir, tarjimon va dramaturg Usmon Nosir hayoti va ijodiga bag‘ishlangan spektakl agentlik xodimlarida juda iliq taassurot uyg‘otdi.