2021-yil 23-sentabr kuni Oliy va o‘rta maxsus ta’lim vazirligi tomonidan akademik litseylarga kirish imtihonlari natijalari e’lon qilindi.

Natijalar e’lon qilinganidan so‘ng test natijasi yuzasidan apellatsiya shikoyati bermoqchi bo‘lgan nomzodlar va ularning ota-onalarini akademik litseylar tomonidan Davlat test markaziga yuborish holatlari kuzatilmoqda.

2021-yil avgust oyida Oliy va o‘rta maxsus ta’lim vazirligi hamda Davlat test markazining qo‘shma qarori bilan “2021-2022-o‘quv yili uchun oliy ta’lim muassasalari tasarrufidagi akademik litseylarga iqtidorli yoshlarni saralab olish uchun test sinovlarini tashkil etish to‘g‘risida” muvaqqat nizom tasdiqlangan bo‘lib, mazkur nizomning 3-bobida test sinovlari natijalari bo‘yicha apellatsiya murojaatlarini ko‘rib chiqish tartibi keltirilgan.

Unga ko‘ra, akademik litseylarda nomzodlarning test sinovi natijasidan noroziligi yuzasidan murojaatlarini ko‘rib chiqish bo‘yicha apellatsiya komissiyasi tashkil qilinadi.

Apellatsiya komissiyasi tarkibiga akademik litsey mas’ul xodimlari va fanlar bo‘yicha ekspertlar kiritiladi hamda apellatsiya komissiyasining tarkibi akademik litsey direktorining buyrug‘i bilan tasdiqlanadi.

Test sinovlari natijasidan norozi bo‘lgan nomzod, uning ota-onasi yoki ularning o‘rnini bosuvchilar (vasiylar) test sinovlari natijasi e’lon qilingandan keyin ikki ish kuni davomida apellatsiya komissiyasiga test natijalari bo‘yicha apellatsiya shikoyatini berishlari mumkin.

Ushbu tartibdan kelib chiqqan holda apellatsiya arizalari test natijalari e’lon qilingan kundan boshlab ikki ish kuni davomida akademik litseylarda tashkil etilgan apellatsiya komissiyalari tomonidan qabul qilinadi.

Shuningdek, akademik litseylarga kirish uchun nomzodlarni ro‘yxatga olish Oliy va o‘rta maxsus ta’lim vazirligining litsey.edu.uz sayti orqali amalga oshirilgan bo‘lib, nomzodlar va ularning ota-onalari tanlangan ta’lim yo‘nalishlari va ularning ustuvorligi bo‘yicha bevosita Oliy va o‘rta maxsus ta’lim vazirligi hamda akademik litseylarga murojaat qilishlari mumkinligini ma’lum qilamiz.

Davlat test markazi matbuot xizmati