O‘zbekiston Respublikasi Vazirlar Mahkamasining 2017-yil 20-iyundagi 393-son qarori bilan tasdiqlangan oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risidagi nizomning 12-bandida abituriyentlarni ro‘yxatdan o‘tkazish har yili 15-iyundan 15-iyulgacha (shu kuni ham) bo‘lgan muddatda amalga oshirilishi va abituriyentlarni ro‘yxatdan o‘tkazish uchun belgilangan muddatlar tugagandan so‘ng hujjatlarga o‘zgartirish va qo‘shimchalar kiritilmasligi belgilab qo‘yilgan.

2019-yilda abituriyentlar test sinovida ishtirok etish uchun  oliy ta’lim muassasalari qabul komissiyalari, Davlat xizmatlari markazlari va Yagona interaktiv davlat xizmatlari portali orqali ro‘yxatdan o‘tkazilgan.

Eslatish joizki, ro‘yxatdan o‘tgan abituriyentlarning ma’lumotlari onlayn tarzda to‘g‘ridan-to‘g‘ri Davlat test markazi bazasiga kelib tushadi.

Davlat test markazi yig‘ilgan baza asosida abituriyentlar uchun test materiallarini tayyorlaydi va test sinovini o‘tkazadi.

Anhor.uz saytidagi maqolada so‘z yuritilgan abituriyent 12-iyul kuni Toshkent tibbiyot akademiyasi qabul komissiyasi tomonidan ro‘yxatdan o‘tkazilgan va “Abituriyent qayd varaqasi” chop etilib, ma’lumotlar to‘g‘riligi operator va abituriyent tomonidan tekshirilib, imzo bilan tasdiqlangan.

“Abituriyent qayd varaqasi” 2 nusxada chop etilgan bo‘lib, 1 nusxasi operatorda qoldirilgan, 2-nusxasi esa abituriyentga taqdim etilgan.

Abituriyent qabul jarayoni yakunlangandan so‘ng Davlat test markaziga o‘zbek tilida emas rus tilida test topshirmoqchi ekanligi, ro‘yxatdan o‘tganda esa o‘zbek tili qayd etilgani borasida murojaat qilgan.

Qayd etish kerakki, Davlat test markazi abituriyentlarning ma’lumotlariga o‘zgartirish kiritish vakolatiga ega emas.

Davlat test markazi matbuot xizmati