Test sinovlari natijasidan norozi bo‘lgan abituriyentlardan apellatsiya shikoyatlari 2020-yil 27-sentabrdan 6-oktabrga qadar (shu kunlari ham) abituriyentlarning shaxsiy kabinetlari (abitur.dtm.uz) orqali qabul qilindi.

10 kun davomida 11 772 nafar abituriyent tomonidan apellatsiya shikoyatlari kelib tushdi.

Apellatsiya komissiyasi tomonidan apellatsiya shikoyatlarini ko‘rib chiqish 28-sentabrdan 26-oktabrga qadar amalga oshirildi.

Har kuni to‘rt smenada tashkil etilgan apellatsiya shikoyatlarini ko‘rib chiqish jarayonida 11 772 nafar abituriyentdan 2 390 nafari (20,3 %) ishtirok etdi, 9 382 nafari (79,7 %) esa ishtirok etmadi.

Qonunchilikka ko‘ra, apellatsiya komissiyasining qarori bo‘yicha ma’lumot O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasiga apellatsiya shikoyatlarini ko‘rib chiqish to‘liq yakunlanganidan so‘ng, besh ish kuni ichida taqdim etiladi.

Apellatsiya komissiyasining qarori O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasi tomonidan tasdiqlangandan so‘ng kuchga kiradi.

Davlat test markazi matbuot xizmati